Էրդողանը` ադրբեջանցիների գնդակահարության մասին

Տարածաշրջան07:55, 14 Հուլիս 2014

Էրդողանը` ադրբեջանցիների գնդակահարության մասին

Թուրքիայում իշխող «Արդարություն և զարգացում» կուսակցության (ԱԶԿ-AKP) կողմից առաջադրված հանրապետության նախագահի թեկնածու, գործող վարչապետ Ռեջեփ Թայիփ Էրդողանը քարոզարշավի շրջանակներում ելույթ է ունեցել Անթալիայում:

Թուրքական «Աքշամ» թերթըի տեղեկացմամբ` Էրդողանն անդրադարձել է ընտրապայաքարում իրեն մրցակից քաղաքական ուժին` երկրի մայր ընդդիմություն համարվող «Ժողովրդահանրապետական կուսակցության»-ը (ԺՀԿ-CHP): Ոչ վաղ անցյալի պատմության դրվագներից ակնարկներ կատարելով` Էրդողանը դիմել է ժողովրդահանրապետականներին համակրող ընդդիմադիր ընտրազանգվածին:

Նա հիշեցրել է ԺՀԿ-ականների իշխանության ժամանակաշրջանում տեղի ունեցած հետևյալ դեպքը:

«1944 թվականն էր: Մեր ադրբեջանցի եղբայրներից 146 հոգի ռուսներից մազապուրծ փախչել և ապաստանել էին Թուրքիայում: Թուրքիան հանուն չեզոքության մեր այդ 146 եղբայրներին հանձնեց Ստալինի զինվորներին: Հենց որ ադրբեջանցի եղբայրներն անցան Բորալթանի կամուրջը, մեր իսկ զինվորների աչքերի առաջ նրանց գնդակահարեցին»:

Էրդողանը նաև հավելել է, որ իրենք երբեք չեն դավաճանի իրենց եղբայրներին, ինչպես որ դա արել են արատավոր անցյալ ունեցող ժողովրդահանրապետականները:

Ermenihaber.am