Խոստանում է, որ «հայ» բառը Թուրքիայում այլևս որպես հայհոյանք չի օգտագործվի

Քաղաքական13:14, 21 Հուլիս 2014

Խոստանում է, որ «հայ» բառը Թուրքիայում այլևս որպես հայհոյանք չի օգտագործվի

Թուրքիայի նախագահի թեկնածու, քրդամետ «Ժողովուրդների դեմոկրատական» կուսակցության (ԺԴԿ-HDP) համանախագահ Լոնդոնում անցկացրել է հանրահավաք և իրականացրել նախընտրական քարոզարշավ: «Դիյարբաքիր» լրատվական կայքի տեղեկացմամբ` բազմամարդ հանրահավաքին մասնակցել են թուրքեր և քրդեր: Դեմիրթաշի խոսքերով` Էրդողանի ղեկավարած իշխանական «Արդարություն և զարգացում» կուսակցությունը (ԱԶԿ-AKP) 12 տարի զբաղված է դեմոկրատիայի անվան տակ դիկտատուրա կառուցելով:

Իրենց իշխանության գալով` ընդդիմադիր թեկնածուն հավաստիացրել է, որ Թուրքիայում հանրային ու քաղաքական կյանքն էապես փոխվելու է:

«Այնպիսի մի կյանքի սկիզբ ենք դնելու, որ սունիադավան մահմեդականը և ալևին միմյանց տեսնելիս մտահոգություն չզգան, իրարից եղբայրության բույր առնեն միայն: Այնպիսի մի կյանքի սկիզբ ենք դնելու, որ չքավորները, գործազուրկները, թոշակառուները ստիպված չլինեն աշխատել գոյություն պահպանելու համար: Երբ արդեն թուրքը չի ատի քրդին, «հայ» բառն այլևս չի գործածվի իբրև հայհոյանք, հրեաները սպառնալիքներ չեն ստանա, փողոցներում կանայք չեն սպանվի»,- ասել է Թուրքիայի նախագահի թեկնածու Սելահաթթին Դեմիրթաշը:

Ermenihaber.am