Թուրքերը դժգոհում են, որ հայերը Կարսի բերդում պարզել են եռագույնը և երգել օրհներգը

Տարածաշրջան10:34, 23 Հուլիս 2014

Թուրքերը դժգոհում են, որ հայերը Կարսի բերդում պարզել են եռագույնը և երգել օրհներգը

Թուրքիայում գործող «Հայերի անհիմն պնդումների դեմ պայքարի միություն» (ASİMDER) կոչվող կազմակերպության նախագահ Գյոքսել Գյուլբեյն իշխանական մարմիններին կոչ է արել սահմանափակել հայ զբոսաշրջիկների գործողությունները:

Ինչպես տեղեկացնում է թուրքական «Իհլաս» լրատվական գործակալությունը, Գյուլբեյը և մի շարք քաղաքացիներ դժգոհել են այն բանից, որ Կարսի բերդ այցելած հայ զբոսաշրջիկները ծածանել են հայկական եռագույնը և երգել հայոց հիմնը: Գյուլբեյը նշել է, որ Հայաստանի անկախության հռչակագրում Արևելյան Անատոլիան անվանված է Արևմտյան Հայաստան, իսկ հայերն էլ այդ շրջաններում իբր սադրիչ գործողություններ են իրականացնում: Գյուլբեյը մեղադրել է ՀՀ իշխանություններին ու մասնավորապես Սփյուռքի նախարարությանը նմանօրինակ գործողություններն աջակցելու համար:

«Հայերը Կարսի բերդի մատույցներում պարզել են Հայաստանի դրոշը և երգել օրհներգը: Նույն բանն արել էին Վանի Աղթամար եկեղեցում: Հայերին այդպիսի վստահություն ու հանգստություն ովքե՞ր են տալիս: Չենք հասկանում` Կարսի նահանգապետարանն ինչո՞վ է զբաղված, անվտանգության ուժերի բանուգործն ի՞նչ է: Մենք հետամուտ ենք լինելու, որ Կարսի ամրոցի համար պատասխանատվություն ստանձնած մարմինները պատժվեն իրենց բացթողումների համար»,- հայտարարել է «ASİMDER»-ի նախագահը:

Վերջինս զգոնության կոչ է արել թուրքական իշխանություններին ու բոլոր համերկրացիներին: Նրա համոզմամբ` հայկական լոբբիստական ուժերը և ՀՀ սփյուռքի նախարարությունը գաղտնի պլան են կազմել 2015-ի նախաշեմին Թուրքիայի տարածքում սադրիչ և քայքայիչ գործողություններ իրականացնելու համար: