ԱՄՆ հրեական կոնգրեսը Էրդողանից պահանջում է վերադարձնել «Խիզախության» մրցանակը

Տարածաշրջան13:49, 29 Հուլիս 2014

ԱՄՆ հրեական կոնգրեսը Էրդողանից պահանջում է վերադարձնել «Խիզախության» մրցանակը

Թուրքիայի վարչապետ Ռեջեփ Թայիփ Էրդողանը ԱՄՆ-ում Թուրքիայի արտակարգ և լիազոր դեսպան Սերդար Քըլըչի միջոցով պատասխան է հղել Ամերիկայի հրեական կոնգրեսին, որն Էրդողանից պահանջել էր հետ վերադարձնել իր իսկ կողմից շնորհված «Խիզախության» մրցանակը: Հայտնում է թուրքական «Stargazete»-ն:

Թուրք դեսպանի՝ Ամերիկայի հրեական կոնգրեսի նախագահ Ջեք Ռոզենին ուղղված նամակում նշվում է. «Էրդողանը ուրախ կլինի հետ վերադարձնել մրցանակը: Սակայն մրցանակի բացակայությունը չի կարող խոչընդոտել ահաբեկչության դեմ Էրդողանի մղած պայքարին: Ինչպես նաև չի կարող արգելք հանդիսանալ իսրայելապաղեստինյան հակամարտության խաղաղ կարգավորմանն ու Թուրքիայում հրեական համայնքի անվտանգությանն ու բարօրությանն ուղղված նրա ջանքերին»:

Հիշեցնենք, որ վերոնշյալ մրցանակը Էրդողանին շնորհվել է դեռևս 2004 թվականին: Սակայն, սույն թվականի հուլիսի 7-ին Իսրայելի կողմից Գազայի հատվածում սկսված ռազմական օպերացիան Թուրքիայի վարչապետի կողմից սուր քննադատության արժանացավ, ինչից հետո էլ Ամերիկայի հրեական կոնգրեսի նախագահը նամակով պահանջեց հետ վերադարձնել մրցանակը:

Ermenihaber.am