Հունաստանից 5.000 բժիշկ համալրելու է Թուրքիայի առողջապահական ոլորտը

Տարածաշրջան12:05, 29 Հուլիս 2014

Հունաստանից 5.000 բժիշկ համալրելու է Թուրքիայի առողջապահական ոլորտը

Թուրքիայում բժշկական մասնագիտություն ունեցողների խիստ պակաս կա: Այդ նպատակով կյանքի կոչված «Բժիշկների ներմուծում» նախաձեռնությունն արդեն տալիս է որոշակի արդյունքներ` շնորհիվ հարևան Հունաստանի: Թուրքական «Միլլիյեթ» պարբերականից Աբդուլլահ Քարաքուշը տեղեկացնում է, որ 20.000 մասնագետ բժիշկների պակաս ունեցող Թուրքիան այդ բացը լրացնելու առաջին քայլերը սկսում է անել Հունաստանի հետ համագործակցությամբ:

Նախատեսվում է առաջին փուլում Հունաստանից Թուրքիա աշխատանքի ընդունել շուրջ 5.000 բժշկի: Թուրքիայի առողջապահության և արտաքին գործերի նախարարություններն արդեն զբաղվում են այդ հարցով: Հունաստանի տնտեսական ճգնաժամի հետևանքով գործազուրկների շարքերը համալրած բազմաթիվ բժիշկներ էլ շահագրգռված են արտագնա աշխատանքի մեկնել Թուրքիա:

Նախորդ շաբաթ գործնական այցով Հունաստանում գտնված Թուրքիայի առողջապահության նախարար Մեհմեթ Մուեզզինօղլուն բարձր էր գնահատել այդ երկրում բժշկական կրթության մակարդակը և օրինակ բերել, թե ինչպես է Գերմանիան 15.000 հույն բժիշկների հետ աշխատանքային պայմանագրեր կնքում 9 տարվա ժամկետով: Նախարարը նաև նշել է, որ իրենք նպատակ ունեն առաջիկայում Թուրքիան դարձնել տարածաշրջանի առողջապահական կենտրոն:

Ermenihaber.am