Նախագահի թեկնածուների համար Թուրքիայում չի ապահովվել հավասար մրցակցություն

Տարածաշրջան12:09, 12 Օգոստոս 2014

Նախագահի թեկնածուների համար Թուրքիայում չի ապահովվել հավասար մրցակցություն

ԱՄՆ պետքարտուղարության խոսնակի օգնական Մարիե Հարֆը հրավիրված մամուլի ասուլիսի ժամանակ անդրադարձել է Թուրքիայում անցկացված նախագահական ընտրություններին: Հարցին, թե ինչպես է գնահատում Թուրքիայի նախագահական ընտրությունները, Հարֆը հղում անելով ԵԱՀԿ զեկույցին պատասխանել է, որ նախընտրական շրջանում չի ապահովվել մրցակցության և ընտրապայքարի հավասար պայմաններ առաջադրված բոլոր թեկնածուների համար:

Ըստ վերոնշյալ զեկույցի` թեկնածուները, սակայն, ազատորեն կարողացել են քարոզարշավ կազմակերպել, օգտվել են հանրահավաքներ անցկացնելու հնարավորություններից:

Հարֆը նշել է, որ Էրդողանը, լինելով կառավարության ղեկավար, օգտագործել է իր տրամադրության տակ եղած վարչական լծակները և կարողացել է առավելության ձեռք բերել մյուս թեկնածուների նկատմամբ:

Ինչպես հայտնում է թուրքական «Դողան» լրատվական գործակալությունը, Հարֆը փորձել է խուսափել այն հարցին պատասխանելուց, թե կարելի է Թուրքիայում անցկացված ընտրությունները ազատ, արդար և թափանցիկ որակել: Ի վերջո, տեղի տալով լրագրողների համառությանը` Հարֆն ասել է. «Ձեզ համար այս թեմայով ավելի խորը վերլություն չունեմ»:

Հարֆը նաև տեղեկացրել է, որ մոտ օրերս ԱՄՆ նախագահ Բարաք Օբաման կապ կհաստատի նորընտիր Էրդողանի հետ և կշնորհավորի նրան:

Ermenihaber.am