Թուրք պաշտոնյաները շարունակում են այցելել վիրավոր ադրբեջանցի զինծառայողներին

Տարածաշրջան10:26, 14 Օգոստոս 2014

Թուրք պաշտոնյաները շարունակում են այցելել վիրավոր ադրբեջանցի զինծառայողներին

Թուրքիայի խորհրդարանի նախագահ Ջեմիլ Չիչեքն այցելել է Անկարայի Աթաթուրքի անվան բժշկական կենտրոնում բուժում ստացող ադրբեջանցի վիրավոր զինծառայողներին և Գազայից տեղափոխված վիրավոր պաղեստինցիներին: Ըստ «Մալաթյա հաբեր» լրատվամիջոցի` նրանց հետ զրույցում Չիչեքը նշել է, որ Թուրքիան սատար է կանգնում ադրբեջանցի ժողովրդին ու պաղեստինցիներին:

Մասնավորապես ղարաբաղա-ադրբեջանական հակամարտ ուժերի շփման գծում դիվերսիոն գործողություններ իրականացնելիս հայ դիրքապահների կողմից վնասազերծված և վիրավորված ադրբեջանցի զինծառայողների հետ զրույցում Չիչեքն ավելի քան 20 տարի չլուծվող ղարաբաղյան հիմնախնդրում մեղադրել է Հայաստանին: Ադրբեջանցիներին հայտնելով եղբայրական կարեկցանք ու աջակցություն` Չիչեքը հույս է հայտնել, որ շուտով վերջ կդրվի «հայկական օկուպացիային»:

Հիշեցնենք, որ ավելի վաղ նշյալ զինծառայողներին այցելել էին Թուրքիայի արտգործնախարար Ահմեթ Դավութօղլուն, ապա նաև Թուրքիա-Ադրբեջան միջխորհրդարանական բարեկամության խմբի համանախագահ Նեջդեթ Ունուվարը:

Ermenihaber.am