Թուրքիան պատրաստվում է Կիպրոս կղզու իր զավթած մասն ապահովել ջրով

Տնտեսական09:45, 16 Սեպտեմբեր 2014

Թուրքիան պատրաստվում է Կիպրոս կղզու իր զավթած մասն ապահովել ջրով

Թուրքիայի նորանշանակ վարչապետ Ահմեթ Դավութօղլուն կառավարության ղեկավարի պաշտոնում նշանակվելուց հետո իր առաջին արտերկրյա այցը կատարել է այսպես կոչված Հյուսիսային Կիպրոսի Թուրքական Հանրապետություն (ՀԿԹՀ): Դավութօղլուին ուղեկցող անձնակազմում է փոխվարչապետ Բյուլենթ Արընրչը, արտգործնախարար Մևլութ Չավուշօղլուն և մի շարք բարձրաստիճան պաշտոնատար այրեր:

Այցից առաջ Էսենբողա օդանավակայանում լրագրողների հարցերին պատասխանելիս վարչապետ Դավութօղլուն նշել է, որ Թուրքիան ևս մեկ անգամ վերահաստատում է իր քաղաքական և տնտեսական աջակցությունը ՀԿԹՀ-ին զարգացման գործում: Վարչապետը նկատել է տվել, որ վերջին 13 տարում ՀԿԹՀ-ն տնտեսապես որոշակի զարգացում է ապրել և ավելի առաջավոր դիրքեր զբաղեցրել նախկինի համեմատ:

Ծրագիր կա Անատոլիայի ջրային պաշարները խողովակաշարով հասցնել Հյուսիսային Կիպրոսի Թուրքական Հանրապետություն և դրանով հոգալ վերջինիս ունեցած ջրային պահանջարկը: Դավութօղլուն հանդիպումներ է ունենալու ՀԿԹՀ-ի նախագահ Դերվիշ Էրօղլուի, խորհրդարանի նախագահ Սիբել Սիբերի և վարչապետ Օզգան Յորգանջըօղլուի հետ:

Հիշեցնենք, որ թուրքական զորքերը Կիպրոս են ներխուժել 1974 թվականին և զավթել կղզու հյուսիսային մասը: Իսկ 1983թ. նոյեմբերի 15-ին թուրքական կողմը հռչակել է Հյուսիսային Կիպրոսի Թուրքական Հանրապետության անկախությունը: Որպես անկախ պետություն Հյուսիսային Կիպրոսի Թուրքական Հանրապետությունը ճանաչված է միայն Թուրքիայի կողմից: Աշխարհի պետությունների մեծ մասը համարում է, որ ՀԿԹՀ-ն Կիպրոսի Հանրապետության օկուպացված տարածքն է։