Թուրքիայի վարչապետի պաթետիկ ելույթը Բաքվում

Քաղաքական10:53, 19 Սեպտեմբեր 2014

Թուրքիայի վարչապետի պաթետիկ ելույթը Բաքվում

Բաքվում գտնվող Թուրքիայի վարչապետ Ահմեթ Դավութօղլուն Ադրբեջանի նախագահ Իլհամ Ալիևի հետ հանդես է եկել համատեղ մամուլի ասուլիսով: Ընթացքում անդրադարձ է եղել ղարաբաղյան հիմնախնդրին: Ըստ թուրքական «Ինտերնետ աժանս» լրատվական կայքի` Դավութօղլուն նշել է, թե Հայաստանը շարունակում է անհաշտ կեցվածք դրսևորել ղարաբաղյան հարցում, ինչի հետևանքով դուրս է մնում բոլոր ծրագրերից ու նախագծերից:

«Ես, որպես Թուրքիայի վարչապետ, իմ ողջ ժողովրդի անունից ասում եմ, որ Թուրքիան Ադրբեջանի կողքին է այնքան ժամանակ, միչև ազատագրվի ադրբեջանական հողերի ամեն մի սանտիմետրը»,- ասել է Դավութօղլուն:

Վերջինս հիշեցրել է նաև, որ ինքը այցելել է Թուրքիայում բուժվող ադրբեջանցի այն զինվորներին, որոնք վիրավորվել էին շփման գծում: Թուրքիայի վարչապետը վստահություն է հայտնել, որ իր երկիրն Ադրբեջանի հետ ուս ուսի տված ջանքեր կգործադրի տարածաշրջանում խաղաղություն հաստատելու համար:

Իր պաթետիկ ելույթում Դավութօղլուն նաև նշել է. «Ադրբեջանի սիրտը խոցող ամեն մի փամփուշտ, խոցում է նաև Թուրքիայի սիրտը»:

Ermenihaber.am