Թուրքիայի խորհրդարանի նախագահը Ավստրալիայում զբաղված է Ցեղասպանությունը հերքելով

Քաղաքական08:38, 27 Սեպտեմբեր 2014

Թուրքիայի խորհրդարանի նախագահը Ավստրալիայում զբաղված է Ցեղասպանությունը հերքելով

Ավստրալիայում գտնվող Թուրքիայի խորհրդարանի նախագահ Ջեմիլ Չիչեքը «Sydney İntercontinental» հյուրանոցում կազմակերպված մամուլի ասուլիսի ժամանակ անդրադարձել է Հայոց ցեղասպանության խնդրին: Հերթական անգամ շարունակելով Անկարայի ժխտողական քաղաքականությունը` Չիչեքը նշել է, որ Ավստրալիա կատարած այցի նպատակներից մեկն էլ ուղղակիորեն առնչվում է 1915 թվականի պատմական իրադարձությունների պարզաբանումը: Նա իր դժգոհությունն է հայտնել, որ Ավստրալիայի որոշ նահանգային խորհրդարաններ բանաձևեր են ընդունել ցեղասպանության մասին:

«Մենք1 իշխանություն-ընդդիմություն, միահամուռ կերպով միջազգային հանրությանը 1915-ի դեպքերի վերաբերյալ բացեիբաց մարտահրավեր ենք արել: Ասել ենք, որ մեր արխիվները բաց են: Դա խորհրդարանների խնդիրը չէ, նրանք չեն կարող պատմական դեպքերի մասին իրավական վճիռներ կայացնել, որովհետև խորհրդարանները միջազգային դատարաններ չեն, ոչ էլ պատմաբանների հաստատություն: Խորհրդարանները ներկայի ու ապագահի կառուցողներն են, խաղաղության, բարեկամության և համագործակցության մեջ ներդրում կատարողները»,- ըստ «Անադոլու» լրատվական գործակալության` ասել է Չիչեքը` ևս մի անգամ շեշտելով, որ եթե անկախ հանձնաժողով կազմվի և արխիվներն ուսումնասիրվեն, Թուրքիան կընդունի արդյունքները ու կառերեսվի:

Ermenihaber.am