Թուրքիայում Ադրբեջանի դեսպանատունը և Գազի համալսարանը հակահայ բնույթի մրցույթ են հայտարարել

Տարածաշրջան09:02, 03 Հոկտեմբեր 2014

Թուրքիայում Ադրբեջանի դեսպանատունը և Գազի համալսարանը հակահայ բնույթի մրցույթ են հայտարարել

Թուրքիայի Գազի համալսարանի գեղարվեստի ֆակուլտետում հայտարաված «Հայերի դաժանությունը պատկերող աֆիշի միջազգային մրցույթի» արդյունքների հրապարակման համար ընտրվել է Հրանտ Դինքի սպանության օրը` հունվարի 19-ը: Այս մասին տեղեկացնում է Ստամբուլում հրատարակվող հայկական «Ագոս» երկլեզու (հայերեն, թուրքերեն) շաբաթաթերթը:

Մրցույթը կազմակերպվել է վերոնշյալ ֆակուլտետի և Թուրքիայում Ադրբեջանի դեսպանության համագործակցությամբ: Մրցույթի հայտարարության մեջ մասնավորապես նշված է, որ թուրքերը իբրև թե գթասիրտ են եղել, բայց հայերի դավաճանանության հետևանքով վերջ է դրվել երկու ժողովուրդների միջև եղած երբեմնի հավատարմությանը:

Ֆակուլտետի դեկան պրոֆեսոր Ալև Չաքմաքօղլուն ասել է, որ, մրցույթի նպատակը առաջին աշխարհամարտի ընթացքում և հետո թուրք ազգի նկատմամբ հայերի իրականացրած կոտորածներն անտարբերության մատնած աշխարհին սթափեցնելն է: Մրցույթին մասնակցելու կոչ է արվել բոլոր այն արվեստագետներին, ովքեր կարևորում են մարդու իրավունքները:

Ermenihaber.am