ERMENI HABER AJANSI

Ստամբուլում, Անկարայում, Ադանայում, Արդվինում, Հաքքարիում, Դիարբեքիրում, Թունջելիում, Անթալիայում, Մուշում, Վանում և մի շարք այլ քաղաքներում արյունալի բախումներ են ընթանում: Հյուսիսսիրիական հիմնականում քրդաբնակ Քոբանի քաղաքի վրա «Իսլամական պետություն» (ԻՊ) ահաբեկչական խմբավորման հարձակումների դեմ Թուրքիայում բողոքի ցույցերի դուրս եկած հազարավոր քրդեր ընդհարումներ են ունեցել ոստիկանական ուժերի հետ: 

Վերջիններս ստիպված են եղել կիրառել արցունքաբեր գազ, շրջան մեքենաներ և ռետինե փամփուշտներ, թեև, ըստ մամուլի հրապարակումների, բախումների ժամանակ գործադրվել է նաև հրազեն: Ընդ որում բախումներ են տեղի ունեցել ոչ միայն ցուցարարների ու ոստիկանների միջև, այլ նաև Քոբանիի համար բողոքի դուրս եկած քրդերի ու Թուրքիայի ազգայնական խմբերի միջև: Էրզրումում մի խումբ ազգայնականներ` զինված խոհանոցային դանակներով, հարձակվել են ցուցարարների վրա և մարմնական վնասվածքներ հասցրել նրանցից շատերին:

Ինչպես բնորոշում է ընդդիմադիր «Ջումհուրիյեթ» պարբերականը, Թուրքիան վերածվել է ռազմադաշտի: Ըստ պաշտոնական տվյալների` բողոքի ցույցերի ժամանակ տեղի ունեցած ընդհարումների հետևանքով կան սպանվածներ Դիարբեքիրում (8 հոգի), Մարդինում (2 հոգի), Շիիրթում (2 հոգի) և Բաթմանում (1 հոգի): Կան նաև բազմաթիվ վիրավորներ, որոնց ստույգ թիվն առայժմ չի հրապարակվում: «Ջումհուրիյեթ»-ը տեղեկացնում է, որ վիրավորվել է իր ֆոտոլրագրող Նեջաթի Սավաշը:  Վանում բողոքի քայլերիթ դուրս եկած ցուցարարները մոլոտովյան կոկտեյլներով հրկիզել են Աթաթուրքի արձանը: 

Փողոցային անկարգություններն ու արյունահեղությունը դադարեցնել կարողանալու համար թուրքական իշխանությունները վեց նահանգներում (Վան, Մուշ, Դիարբեքիր, Մարդին, Բաթման և Շիիրթ) փողոց դուրս գալն արգելող հրահանգ են արձակել:

Ermenihaber.am