Էրդողանը Փարիզում Օլանդից խնդրելու է չեզոքություն հանդես բերել Հայոց ցեղասպանության հարցում

Քաղաքական13:14, 31 Հոկտեմբեր 2014

Էրդողանը Փարիզում Օլանդից խնդրելու է չեզոքություն հանդես բերել Հայոց ցեղասպանության հարցում

Թուրքիայի նախագահ Ռեջեփ Թայիփ Էրդողանը աշխատանքային այցով մեկնել է Փարիզ: Ֆրանսիայի նախագահ Ֆրանսուա Օլանդը թուրք պաշտոնակցին ընդունել է Ելիսեյան պալատում: Շառլ դը Գոլի օդանավակայանում Թուրքիայի նախագահին դիմավորել է Ֆրանիայում Թուրքիայի արտակարգ և լիազոր դեսպան Հաքիքի Աքիլը և մի շարք այլ բարձրաստիճան այրեր: Ինչպես հայտնում է Թուրքիայի նախագահի պաշտոնական կայքը, փարիզյան այցի ընթացքում Էրդողանին ուղեկցում են ԵՄ հարցերով նախարար և գլխավոր բանագնաց Վոլքան Բոզքըրը և պաշտպանության նախարար Իսմեթ Յըլմազը:

Թուրքական իշխանություններին մոտ կանգնած «Աքշամ» թերթը տեղեկացնում է, որ Էրդողանի փարիզյան քննարկումների օրակարգը բավական հագեցած է տարատեսակ թեմաներով: Մասնավորապես Հայոց ցեղասպանության հարցում 100-ամյա տարելիցին ընդառաջ Թուրքիայի նախագահը պաշտոնական Փարիզին ցանկություն է հայտնելու, որ վերջինս չեզոքություն հանդես բերի: Օլանդի հետ քննարկվելու է նաև Թուրքիայի ԵՄ անդամակցությանն առնչվող հարցեր, Սիրիայում «Իսլամական պետություն» ահաբեկչական խմբավորման դեմ համատեղ պայքարի և Թուրքիայի Սինոպ քաղաքի մերձակայքում ճապոնական «Mitsubishi» և ֆրանսիական «Areva» հետ համատեղ կառուցվելիք ատոմակայանի թեմաները: Նշվում է, որ Էրդողանը նպատակադրվել է մինչև 2023 թվականը` Թուրքիայի Հանրապետության հռչակման 100 ամյակը, հասցնել ավարտել 22 մլրդ դոլար արժողությամբ ատոմակայանի շինարարությունը:

Ermenihaber.am