Ըստ Քըլըչդարօղլուի` Էրդողանի արածը կամ դավաճանություն է, կամ` փողի մսխում

Տարածաշրջան13:48, 11 Նոյեմբեր 2014

Ըստ Քըլըչդարօղլուի` Էրդողանի արածը կամ դավաճանություն է, կամ` փողի մսխում

Թուրքիայի գլխավոր ընդդիմադիր ուժի` «Ժողովրդահանրապետական» կուսակցության (ԺՀԿ-CHP) առաջնորդ Քեմալ Քըլըչդարօղլուն կուսակիցների հետ անցկացրած ժողովում անդրադարձել է նոր նախագահական պալատի` Աք Սարայի հարցին: Ըստ «Ջումհուրիյեթ» լրատվականի` ընդդիմադիր առաջնորդը, դիմելով Էրդողանին, ասել է.

«Եթե Աք Սարայը ժողովրդի փողով ես կառուցում, ուրեմն դա դավաճանություն է, իսկ եթե քո անձնական միջոցներով ես կառուցում, դա մսխում է»:

Քըլըչդարօղլուն թուրքական իշխանություններին մեղադրել է երկիրն աշխարհի աչքին ծաղրի առարկա դարձնելու մեջ: Շեշտել է, որ նախագահական նոր նստավայրը 1000 սենյակ ունի, բայց դրանով չի որոշվում պետության ղեկավարի հարգարժանությունը: Եթե օրինակ Սպիտակ տունը 6 անգամ փոքր է Աք Սարայից, դա չնշանակեց, թե ԱՄՆ նախագահը պակաս հարգարժան է:

«Մինչդեռ Էրդողանն ու Դավութօղլուն այդպես չեն կարծում»,- դժգոհել է ընդդիմադիր առաջնորդը:

Հիշեցնենք, որ Թուրքիայի ֆինանսների նախարար Մեհմեթ Շիմշեքը խորհրդարանում հայտարարել է, որ նոր նախագահական պալատի արժեքը կազմում է 1 մլրդ 370 մլն թուրքական լիրա (շուրջ 615 մլն դոլար): Թուրքիայի նոր նախագահական պալատը հավակնում է լինել աշխարհում ամենամեծը: Ըստ զբաղեցրած տարածքի (300.000քմ)` Էրդողանի նոր նստավայրն այժմ առաջինն է աշխարհում: Երկրորդ տեղում Բրունեի սուլթանի նստավայրն է (200.000քմ): Համեմատության համար նշենք, որ օրինակ Անգլիայի Բուքինգհեմյան պալատը զբաղեցնում է 77.000քմ, Սպիտակ տունը` 55.000քմ, իսկ Կրեմլը` 25.000քմ տարածք: