Ադրբեջան է մեկնել Թուրքիայի ժանդարմերիայի հրամանատարը

Տարածաշրջան12:05, 12 Նոյեմբեր 2014

Ադրբեջան է մեկնել Թուրքիայի ժանդարմերիայի հրամանատարը

Օրերս Ադրբեջան մեկնած Թուրքիայի հատուկ նշանակության զորքերի հրամանատարի այցին հաջորդել է 2-րդ բարձրաստիճան թուրք զինվորականի այցը Բաքու: Թուրքական «Սյոզջու» պարբերականի էլ-կայքի տեղեկացմամբ` Ադրբեջան է մեկնել Թուրքիայի ժանդարմերիայի գլխավոր հրամանատար, բանակի գեներալ Աբդուլլահ Աթայը:

Նախատեսվում է, որ վերջինս պետք է այցելի հայ-ադրբեջանական հակամարտ ուժերի շփման գիծ: Աղբյուրն ընդգծում է, որ Աբդուլլահ Աթայի այցն ուշագրավ է հատկապես այն ֆոնին, երբ մի քանի ամիս է մնացել Հայոց ցեղասպանության 100-ամյա տարելիցին:

Հիշեցնենք, որ նախորդ շաբաթավերջին Ադրբեջանի պաշտպանության նախարարության հրավերով այդ երկիր մեկնած թուրք գեներալ Զեքաի Աքսաքալլըն շրջել էր առաջնագծի ադրբեջանական հենակետերով և ծանոթացել դիպուկահարների դիրքերին: Դիմելով մարտական հերթապահություն իրականացնող ադրբեջանցի դիրքապահներին` նա ասել էր.

«Ձեզանով հպարտանում եմ: Տեսա և ուրախացա, որ դուք բարոյապես ու տեխնիկապես լավ վիճակում եք: Թուրքիան միշտ Ադրբեջանի կողմից է: Ադրբեջանցի և թուրք զինվորն անպարտելի է: Դա բազմիցս ապացուցել ենք պատերազմներում»:

Նշենք, որ Արցախի ազատագրական պատերազմում պարտվողը հենց ադրբեջանցի զինվորներն էին:

Ermenihaber.am