Չավուշօղլու. Անկարան կողմնակից է ղարաբաղյան հիմնախնդրի խաղաղ լուծմանը

Քաղաքական08:20, 28 Նոյեմբեր 2014

Չավուշօղլու. Անկարան կողմնակից է ղարաբաղյան հիմնախնդրի խաղաղ լուծմանը

Թուրքիայի արտաքին գործերի նախարար Մևլութ Չավուշօղլուն Դիարբեքիրում մասնակցել է իշխանական «Արդարություն և զարգացում» կուսակցության (ԱԶԿ-AKP) նահանգային կառույցի կուսակցական ժողովին, որի ընթացքում ելույթ ունենալիս անդրադարձել է Հայաստան-Թուրքիա հարաբերությունների թեմային:

Ըստ թուրքական «Հաբերլեր» լրատվակայքի` Չավուշօղլուն հիշեցրել է, որ հայկական կողմը անպատասխան է թողել ժամանակին Թուրքիայի վարչապետ Էրդողանի կողմից արված առաջարկը համատեղ հանձնաժողով ձևավորելու և արխիվները բացել-ուսումնասիրելու մասին: Հայաստանի հետ հարաբերությունները կարգավորելու վերաբերյալ արտգործնախարարը նշել է, թե իբր Անկարան որոշակի նախաձեռնություններով է հանդես եկել երկկողմ հարաբերությունները կարգավորելու համար: Որպես օրինակ` նշել է Թուրքիայի նախկին նախագահ Աբդուլլահ Գյուլի 2008-ին Հայաստան կատարած այցը:

Չավուշօղլուն նաև նշել է, որ իրենք կողմնակից են ղարաբաղյան հիմնախնդրի խաղաղ ճանապարհով լուծմանը` դժգոհելով, թե հայերը դեռ «գրաված են պահում Ադրբեջանի հողերը»:

Ermenihaber.am