Պուտին. «Թուրք գյուղատնտեսները կարող են լցնել ռուսական մեծ շուկայի դատարկ տեղերը»

Տնտեսական09:27, 29 Նոյեմբեր 2014

Պուտին. «Թուրք գյուղատնտեսները կարող են լցնել ռուսական մեծ շուկայի դատարկ տեղերը»

Թուրքիա կատարելիք այցից առաջ Ռուսաստանի Դասշնության (ՌԴ) նախագահ Վլադիմիր Պուտինը զրուցել է թուրքական «Անադոլու» պետական լրատվական գործակալության թղթակցի հետ: Պուտինը ողջունել է երկու երկրների միջև առևտրաշրջանառության ծավալները մեծացնելու թուրքական կառավարության ցանկությունը:

«Թուրք գյուղատնտեսները կարող են լցնել ռուսական մեծ շուկայի դատարկ տեղերը: Ջերմորեն ենք վերաբերվում Ռուսաստան մսամթերք, կաթնամթերք, ծովամթերք, միրգ և բանջարեղեն արտահանելու թուրք արտադրողների մտադրություններին»,- ասել ՌԴ նախագահը: Վերջինս ուշադրություն է հրավիրել այն բանի վրա, որ Անկարան կարողանում է ինքնուրույն որոշումներ կայացնել իր արտաքին քաղաքականությունում: ՌԴ նախագահը Թուրքիայի հետ առևտրաարդյունաբերական նոր համագործակցություն զարգացնելու հնարավորություններ է մատնանշել: Բացի այդ Պուտինը նշել է նաև, որ թուրք պաշտոնակցի հետ պատրաստվում է քննարկել էներգետիկ ոլորտում ահմատեղ ռազմավարական նախագծեր կյանքի կոչելու հարցեր ևս:

«Թուրքիան Ռուսաստանի կարևորագույն առևտրային գործընկերն է և դա պահպանվելու է: 2013-ին մեր երկու երկրների միջև առևտրաշրջանառության ծավալը կազմել է 32.7 մլրդ դոլար: Թուրքիայում կատարած ռուսական ուղղակի ներդրումները հասնում են 1.7 մլրդ դոլարի, իսկ Ռուսաստանում թուրքական ներդրումների չափը գրեթե հասնում է 1 մլրդ դոլարի: Այս դրական ընթացքն ավելի բարելավելը բխում է երկու երկրների շահերից»,- նշել է Պուտինը և հիշեցրել, որ Էրդողանի հետ ավելի վաղ համաձայնության էին եկել առևտրաշրջանառությունը հասցնել 100 մլրդ դոլարի:

Հիշեցնենք, որ Պուտինը պաշտոնական այցով Թուրքիա է մեկնելու դեկտմեբերի 1-ին և մասնակցելու Թուրքիա-Ռուսաստան բարձր մակարդակի համագործակցության խորհրդի 5-րդ նիստին: Վերջինս ստեղծվել է 2010-ին, երբ ՌԴ նախագահը պետական այց էր կատարել Թուրքիա:

Ermenihaber.am