Չավուշօղլուն խոսել է սահմանի բացման և Օբամայի հետ գոլֆ խաղալու իր ցանկությունների մասին

Քաղաքական09:15, 03 Դեկտեմբեր 2014

Չավուշօղլուն խոսել է սահմանի բացման և Օբամայի հետ գոլֆ խաղալու իր ցանկությունների մասին

Հյուսիսատլանտյան դաշինքի անդամ երկրների արտգործնախարարների ժողովին մասնակցելու մեկնող Թուրքիայի արտգործնապարար Մևլութ Չավուշօղլուն օդանավում պատասխանել է լրագրողների հարցերին: Ըստ թուրքական «Իհլաս» լրատվական գործակալության` Չավուշօղլուն, ողջունել է Ռուսաստանի կողմից Թուրքիային կատարվելիք բնական գազի 6 տոկոսանոց զեղչը, բայց և ընդգծել, որ թուրքական կողմը սակագնի ավելի մեծ զեղչ է ցանկանում: Այդ ուղղությամբ դեռ բանակացություններ են տարվելու մինչև դեկտեմբերի 8-ը:

Չավուշօղլուն անդրադարձել է նաև Հռոմի պապ Ֆրանցիսկոսի 1-ինի` օրերս Թուրքիա կատարած այցին: Պապը մասնավորապես ասել էր. Իմ սրտի ցանկությունն է, որ թուրք-հայկական սահմանը բացվի: Այնքան լավ կլինի, որ այդ սահմանը բացվի: Ես գիտեմ, որ այդ տարածաշրջանում կան աշխարհաքաղաքական հարցեր, որոնք դժվարեցնում են սահմանների բացումը, սակայն եկեք աղոթենք հանուն այն բանի, որ այս ժողովուրդների միջև հաշտեցում լինի»:

Մեկնաբանելով պապի խոսքերը` Թուրքիայի արտգործնախարարն ասել է. «Դա Հռոմի պապի ցանկությունն է ընդամենը: Մենք էլ ենք ուզում, որ սահմանը բացվի: Բայց հայկական հարցում միայն Թուրքիան է քայլ կատարում: Մյուս կողմը ձայն չի հանում: Մեր մեկնած ձեռքն անպատասխան է մնում»:

Չավուշօղլուն, խոսելով իր ցանկություններից, նշել է, որ կուզենար ԱՄՆ նախագահ Բարաք Օբամայի հետ գոլֆ խաղալ, երբ վերջինս «Մեծ քսանյակ»-ի գագաթաժողովին մասնակցելու համար կմեկնի Թուրքիա:

Ermenihaber.am