Թուրք պատգամավորը սահմանի ականազերծման հարցը կապել է Հայոց ցեղասպանության 100-րդ տարելիցի հետ

Քաղաքական13:59, 09 Դեկտեմբեր 2014

Թուրք պատգամավորը սահմանի ականազերծման հարցը կապել է Հայոց ցեղասպանության 100-րդ տարելիցի հետ

Թուրքիան, ըստ ՄԱԿ-ի զարգացման ծրագրի, մրցույթ է հայտարարել Հայաստանի և մյուս հարևանների հետ սահմանամերձ գոտին ականազերծում իրականացնելու համար: Ընդդիմադիր «Ազգայնական շարժում» կուսակցության (ԱԶԿ-MHP) պատգամավոր Մեհմեթ Գյունալը, անդրադառնալով այս հարցին, նախ հիշեցրել է, որ փաստորեն թուրքական ընկերությունները դուրս են մնացել հայտարարված մրցույթից:

Ընդդիմադիր պատգամավորը հարց է բարձրացրել, թե ինչու պիտի Թուրքիայի սահմանամերձ գոտիների ականազերծումն իրականացնեն Եվրամիության ֆոնդերը կամ ՄԱԿ-ի զարգացման ծրագիրը:

«Ի՞նչ է, ականազերծելու համար Թուրքիան փող չունի՞,- վրդովմունք է հայտնել Գյունալը: -Ինչու է այդպե՞ս: Որովհետև մոտենում է հայերի տեղահանության 100-րդ տարելիցը: Ահա թե ինչու իշխանությունները և հանրապետության նախագահը կուլիսներում տված խոստումները պահել կարողանալու համար նմանօրինակ քայլերի են դիմում»,- ըստ թուրքական «Հաբերլեր» կայքի` եզրակացրել է ընդդիմադիր պատգամավորը:

Նշենք, որ նախատեսվում է ականազերծել 11.5 մլն քմ տարածք Հայաստանի, Իրանի և Ադրբեջանի հետ սահմանակից գոտիներում: Ծրագրի արժեքը կազմում է շուրջ 80 մլն եվրո: Թուրքիան հարևանների հետ սահմանամերձ գոտիներում ականազերծման աշխատանքները ցանկանում է կատարել է իր չափանիշները Եվրամիության սահմանների համալիր կառավարման քաղաքականության և ռազմավարության հետ համապատասխանեցնելու նպատակով: Ականամաքրումից հետո պիտի ներդրվեն սահմանների վերահսկման ավելի մարդասիրական և արդյունավետ ժամանակակից համակարգեր:

Ermenihaber.am