Անկարայի քաղաքապետի` հայկական թեմային առնչվող սկանդալային գրառումը Twitter-ում

Տարածաշրջան12:25, 19 Մարտ 2015

Անկարայի քաղաքապետի` հայկական թեմային առնչվող սկանդալային գրառումը Twitter-ում

Անկարայի քաղաքապետ Մելիհ Գյոքչեքը Twitter միկրոբլոգի իր էջում, դիմելով Գերմանիայի «Կանաչների կուսակցության» համանախագահ, ծագումով թուրք Ջեմ Օզդեմիրին, հարցում է արել, թե արդյոք նա հայկական ծագում ունի:

Գյոքչենը մասնավորապես հետևյալ գրառումն է կատարել. «Հետաքրքրությունից դրդված հարցնում եմ Գերմանիայի «Կանաչների կուսակցության» պատգամավորին: Ջեմ Օզդեմիր, պատասխանիր, խնդրում եմ, դու հայկական ծագո՞ւմ ունես»:

Այնուհետև Անկարայի քաղաքապետը խորհուրդ է տվել «նրանց, ովքեր Թուրքիային մեղադրում են ցեղասպանության մեջ, թող նախ իրենք առերեսվեն իրենց գործած ցեղասպանությունների հետ»:

Հիշեցնենք, որ օրեր առաջ Երևան կատարած իր այցի ժամանակ Ջեմ Օզդեմիրը կոչ էր արել Գերմանիային ճանաչել 100 տարի առաջ Օսմանյան կայսրությունում իրականացված հայոց ցեղասպանությունը: Նաև ծաղկեպսակ դնելով Հայոց ցեղասպանության հուշահամալիրում՝ Օզդեմիրն ասել էր, որ թուրքական ծագում ունենալու պատճառով ինքը պարտավորված էր այցելել Ծիծեռնակաբերդ»:

Գյոքչեքի թվիթերյան վերոնշյալ գրառմանն արձագանքել են մի շարք օգտատերեր: Թուրքական «nediyor.com» կայքում հրապարակված լուրի տակ մեկնաբանություն թողած Բյուլենթ Քենեշ անունով օգտատերը գրել է. «Մելիհ Գյոքչեք, հանկարծ ու չորոշես կենդանիների իրավունքների պաշտպանությամբ զբաղվել: Թե չէ մի խելագար կարող է վեր կենալ ու հարցնել՝ դու կենդանի՞ ես»:

Իսկ Թուֆան Թուրենչը գրել է. «Անկարա գնալիս մարդ տխրում է: Ակնհայտ է, որ Մելիհ Գյոքչեքը այլևս ոչ թե քաղաքի հարցերով է զբաղված, այլ սրան-նրան լեզվակոխ անելով»:

Աղբյուր` Ermenihaber.am