Թուրքիան Ուկրաինային 50 մլն դոլարի վարկ և 10 մլն դոլարի հումանիտար օգնություն կտրամադրի

Տարածաշրջան07:11, 23 Մարտ 2015

Թուրքիան Ուկրաինային 50 մլն դոլարի վարկ և 10 մլն դոլարի հումանիտար օգնություն կտրամադրի

Թուրքիան որոշում է կայացրել Ուկրաինային խոշոր չափերի վարկ և մարդասիրական օգնություն տրամադրել:

Այս մասին տեղեկացնող «ՀաբերԹուրք» լրատվական ծառայությունը հայտնում է, որ պաշտոնական այցով Ուկրաինայում գտնվող Թուրքիայի նախագահ Ռեջեթ Թայիփ Էրդողանն իր այցի շրջանակներում հանդիպել է Ուկրաինայի նախագահ Պյոտր Ալեքսեևիչ Պորոշենկոյի հետ: Երկու երկրների նախագահների՝ 3.5 ժամ տևած հանդիպումից հետո համատեղ մամուլի ասուլիս են կազմակերպվել:

Հանդիպման ավարտին կողմերը Թուրքիա-Ուկրաինա ռազմավարական համագործակցության խորհրդի 4-րդ նիստի արդունքներին վերաբերող համատեղ հայտարարություն են ստորագրել:

Ասուլիսի ժամանակ Էրդողանը տեղեկացրել է, որ Թուրքիան Ուկրաինային 50մլն դոլարի վարկ կտրամադրի, իսկ ևս 10մլն դոլար, որպես հումանիտար օգնություն, կհատկացնի իրենց բնակավայրերից տեղահանված ուկրաինացիներին:

Բացի այդ. երկու երկրների նախագահները քննարկել են նաև առևտրատնտեսական հարցեր: Թուրքիայի նախագահը մասնավորապես ընդգծել է, որ 2003թ. Ուկրաինայի հետ առևտրաշրջանառության ծավալը կազմում էր ընդամենը 1.3 մլրդ դոլար, իսկ 2014-ի տարեվերջին այդ գումարը հասել է 6 միլիարդի: Էրդողանը հույս է հայտնել, որ մինչև 2023թ. երկու երկրների միջև առևտրաշրջանառության ծավալը կհասնի 20 մլրդ դոլարի:

Աղբյուր` Ermenihaber.am