ERMENI HABER AJANSI

Թուրքիայում մի շարք լրատվամիջոցների թղթակիցներին թույլ չեն տվել  մասնակցել ահաբեկչական հարձակման հետևանքով զոհված դատախազ Մեհմեթ Սելիմ Քիրազի հուղարկավորությանը և վարչապետ Ահմեթ Դավութօղլուի մամուլի ասուլիսին:

Թուրքական «Ռադիքալ» թերթի տեղեկացմամբ՝ սահմանված արգելքը վերաբերել է «Hürriyet», «Cumhuriyet», «Bugün», «Milat», «Taraf», «Zaman» թերթերին և «CNN Türk», «Bugün TV», «Kanaltürk», «İMC TV», «Samanyolu TV», «Cihan Haber Ajansı» ու «Doğan Haber Ajansı» լրատվական ծառայություններին:

Որպես հիմնավորում նշվել է, թե տվյալ լրատվամիջոցները հրապարակել են լուսանկարներ, որտեղ դատախազը նկարված է  զենքը քունքին: Դավութօղլուն, այդ պահվածքն ու վերաբերմունքն անվանելով «անբարոյականություն», բացահայտ տեղեկացրել է, որ լրատվամիոցների հավատարմագրման նման կարգի հրահանգն ինքն է տվել և պատրաստ է ամեն տեսակ քննադատության:

Թուրքիայի լրագրողների միությունը  հավատարմագրման սահմանափակումների մասին որոշումը քննադատող  հայտարարությամբ է հանդես եկել` ասելով. «Վարչապետը հայտարարում է   հասարակության միասնության և հանդուրժողականության անհրաժեշտության մասին, բայց միևնույն ժամանակ լրատվամիջոցների ներկայացուցիչների հավատարմագրում է անցկացնում, ինչը  դեմ է լրագրողների մեջ հավասարության սկզբունքին: Խոչընդոտում է  ժողովրդի տեղեկություն ստանալու իրավունքը»:

Դատախազի պանտանդառության լուսանկարները հրապարակելու  համար  Ստամբուլի գլխավոր դտախազության ահաբեկչության և կազմակերպված հանցագործությունների վարչությունը հետաքննություն է սկսել «Հյուրիյեթ», «Ջումհուրիյեթ», «Փոսթա» և «Բուգյուն» թերթերի նկատմամբ: Նշյալները մեղադրվում են«ահաբեկչական կազմակերպության օգտին քարոզչություն անելու» մեջ:

Հիշեցնենք, որ մարտի 31-ին Թուրքիայում ձախակողմյան «Հեղափոխական ժողովրդական ազատագրական կուսակցություն-ճակատը» պատանդ է վերցրել թուրք դատախազ Մեհմեթ Սելիմ Քիրազը, ով վարում է Բերքին Էլվանի սպանության գործը: Էլվանը  զոհվել էր Գեզի զբոսայգու բախումների ժամանակ ոստիկանների գործողությունների հետևանքով: Ոստիկանության հատուկ գործողությունների հետևանքով զոհվել էր նաև դատախազը: