Թուրք ոստիկանապետը քնել է Գալիպոլիի միջոցառումներին նվիրված ասուլիսի ժամանակ

Տարածաշրջան14:31, 03 Ապրիլ 2015

Թուրք ոստիկանապետը քնել է Գալիպոլիի միջոցառումներին նվիրված ասուլիսի ժամանակ

Թուրքիայում Չանաքքալեի (Դարդանել, Գալիպոլի) մարտերի 100 ամյակի առթիվ ապրիլի 24-25-ին կայանալիք պետական տոնակատարություններն ուղիղ եթերով կցուցադրվեն քաղաքի մի քանի կետերում՝ նրանց համար, ովքեր տարածքի մարդաշատ լինելու պատճառով չեն կարողանա անմիջականորեն մասնակցել միջոցառումներին:

Ըստ թուրքական «sondakika.com» լրատվակայքի՝ այս մասին հայտարարել է Չանաքքալեի նահանգապետ Ահմեթ Չընարը՝ նախօրեին հրավիրված մամուլի ասուլիս ժամանակ՝ միաժամանակ հայտարարելով, որ Չանաքքալեի 100 ամյակի առթիվ այլընտրանքային տոնակատարությունները կկատարվեն նաև օգոստոսի 8-ին:

Պատասխանելով լրագրողների հարցերին՝ Չանաքքալեի նահանգապետը վերահաստատել է ավելի վաղ հրապարակված այն լուրը, որ ապրիլի 24-25-ին միայն Ավստրալիայից և Նոր Զելանդիայից 10.500 հյուր է ժամանելու Թուրքիա: Գալիպոլիի միջոցառումներին սպասվում է նաև Նոր Զելանդիայի գեներա-նահանգապետի ու վարչապետի մասնակցությունը:

Ուշագրավ է այն, որ Չանաքքալեի նահանգապետի հրավիրած մամուլի ասուլիսի ժամանակ մարզային ոստիկանության պետ Յըլմազ Օզդենը քնել է: Ոստիկանապետը շարունակել է քնել նույնիսկ այն բանից հետո, երբ գործընկերները փորձել են արթնացնել նրան: Եվ միայն սրահում առաջացած իրարանցումըն է արթնացրել Օզդենին:

Աղբյուր` Ermenihaber.am