Թուրքական Sabah-ն անդրադարձել է ASALA-ի անունից տարածված հայտարարությանը

Տարածաշրջան08:12, 04 Ապրիլ 2015

Թուրքական Sabah-ն անդրադարձել է ASALA-ի անունից տարածված հայտարարությանը

Թուրքական «Սաբահ» իշխանամետ թերթի կայքն անդրադարձել է ԱՍԱԼԱ-ի (Հայաստանի ազատագրության հայ գաղտնի բանակ) անունից տարածված այն հայտարարությանը, որով կազմակերպությունը երկրների ղեկավարներին կոչ է արել չմասնակցել Թուրքիայի նախագահ Ռեջեփ Թայիփ Էրդողանի նախաձեռնությամբ ապրիլի 24-ին Դարդանելում կազմակերպվելիք միջոցառումներին:

Հայտարարության մեջ դատապարտվում էր Թուրքիայի ղեկավարության կողմից Հայոց ցեղասպանության հիշատակման օրը կազմակերպվելիք տոնախմբություններն ու նշվում, որ դրանց կայանալու դեպքում ԱՍԱԼԱ-ի ռազմական խորհուրդը կքննարկի Թուրքիայի դեմ ռազմական գործողությունների վերսկսման ծրագիրը:

Կայքի հաղորդմամբ`ԱՍԱԼԱ-ի անունից նմանատիպ բովանդակությամբ նամակներ են ուղարկվել Թուրքիայի արտերկրյա դիվանագիտական առաքելություններին ու տուրիստական ընկերությունների էլեկտրոնային հասցեներին:

Sabah-ը վերոնշյալ զգուշացումը որակել է իբրև սպառնալիք` նշելով, որ ԱՍԱԼԱ-ն նպատակ ունի խուճապ առաջացնել, ահաբեկել Թուրքիա հրավիրված տարբեր երկրների առաջնորդներին: Հոդվածում նաև նշվում է, որ ԱՍԱԼԱ-ի սպառնալիքներին զուգահեռ ԱՄՆ-ում ու Եվրամիությունում ապրող ծայրահեղական հայացքներ ունեցող հայերը ֆիզիկական ուժով խոչնդոտում են թուրքերի կողմից այդ երկրներում կազմակերպվող միջոցառումները: Որպես օրինակ բերվում է 2014-ի օգոստոսի 18-ին Ռուսաստանի ազգությամբ հայ քաղաքացի Արթուր Միրզոյանի կողմից Մոսկվայում թուրքական դեսպանատան վրա կրակոցները, 2015-ի փետրվարի 27-ին Տորոնտոյի համալսարանում թուրքական ՀԿ-ների ծրագրած ժխտողական գիտաժողովի խափանումը հայ համայնքի կողմից և այլն:

Աղբյուր` Ermenihaber.am