Դավութօղլուն Երզնկայի հանրահավաքի ժամանակ կրկին անդրադարձել է ցեղասպանության հարցին

Քաղաքական08:08, 27 Ապրիլ 2015

Դավութօղլուն Երզնկայի հանրահավաքի ժամանակ կրկին անդրադարձել է ցեղասպանության հարցին

Թուրքիայի վարչապետ Ահմեթ Դավութօղլուն այդ երկրում կայանալիք առաջիկա խորհրդարանական ընտրությունների քարոզարշավի շրջանակներում նախընտրական հանդիպում է ունեցել Էրզինջանում (Երզնկա), որտեղ կրկին անդրադարձել է ցեղասպանության թեմային` ասելով, որ իրենք անզիջում են լինելու այդ հարցում:

Դավութօղլուն, հայտարարելով, թե Էրզինջանը թուրքերով ու քրդերով ամուր կանգնած է եղել, երբ թշնամին ցանկացել է զավթել այն, շեշտել է. «Այս հրապարակից դիմում ենք նրանց, ովքեր ցանկանում են 100-ամյա հաշիվ պահանջել: Մենք չենք տեղավորել ձեզ այս հողերի վրա և Աստծո կամքով Ձեզ գլուխ չենք խոնարհի: Մենք կառերեսվենք մեր պատմության հետ: Մենք կարեկցանք ունեցող ժողովուրդ ենք, սակայն մեզ հետ մեծամտությամբ խոսողներին իրենց տեղը ցույց կտանք»:

Ըստ թուրքական «Milliyet» թերթի կայքի` Դավութօղլուն քննադատել է նաև քրդամետ «Ժողովուրդների դեմոկրատական կուսակցության» (ԺԴԿ-HDP) նախագահ Սելահեթթին Դեմիրթաշին` նկատի ունենալով Հայոց ցեղասպանության հարցում վերջինի հայամետ դիրքորոշումը:

«Դեմիրթաշն այս ժողովրդին զրպարտում է: Ամբողջ աշխարհին առաջարկել ենք բացել մեր արխիվները: Սակայն իմացեք, որ մենք գլուխ չենք խոնարհելու: Դա թող իմանան և մեր թշնամիները, և մեր բարեկամները»,- ասել է Թուրքիայի վարչապետը:

Աղբյուր` Ermenihaber.am