Թուրքերն անհանգստացած են հայկական ու հրեական կազմակերպություների համագործակցությունից

Տարածաշրջան08:00, 28 Ապրիլ 2015

Թուրքերն անհանգստացած են հայկական ու հրեական կազմակերպություների համագործակցությունից

ԱՄՆ-ի Հարավային Կալիֆորնիայի համալսարանի «Shoah» հիմնադրամը հայերին աջակցում է ցեղասպանության վերաբերյալ ֆիլմեր նկարահանելու գործում: Ցեղասպանության ակտիվ ժխտողականությամբ աչքի ընկնող թուրքական «aktifmedya» լրատվական կայքը գրում է, որ սիոնիստների կողմից հիմնադրված Կալիֆորնիայի համալսարանի ենթակայության տակ գտնվող վերոնշյալ հիմնադրամի նախագահ Արի Զևն ու Հայկական ֆիլմերի հիմնադրամի հիմնադիր Մայքլ Հակոբյանը 5 տարվա համատեղ աշխատանքի արդյունքում Հայոց ցեղասպանության թեմայով արդեն 100-ավոր տեսանյութեր են արտադրվել:

Թուրքական լրատվամիիջոցը շեշտել է նաև այն հանգամանքը, որ «Shoah» հիմնադրամի կայքում տեղ է գտել Ֆրանցիսկոս Պապի կողմից արված «Դարի առաջին ցեղասպանություն» արտահայտությունը: Հիմնադրամն ապրիլի 24-ին ցեղասպանության վերաբերյալ ֆիլմ և փաստագրական նյութեր էլ է ցուցադրել:

Կայքն անհանգստություն է արտահայտել նաև Իսրայելի նախագահի նստավայրում կազմակերպված միջոցառուման ժամանակ նախագահ Ռիվլինի հետևյալ արտահայտությունից. «Հայ ժողովուրդը ժամանակակից զանգվածային սպանության առաջին զոհն է»:

Նշվում է, որ չնայած այն հանգամանքին, որ Իսրայելը Հայոց ցեղասպանությունը պաշտոնապես չճանաչած պետություն է, սակայն այս տարի արդեն նախագահի նստավայրում ցեղասպանությանը նվիրված պաշտոնական արարողություն է կազմակերպվել: Շեշտվում է այն միտքը, որ նման աննախադեպ արարողության անցկացումը կարող է ցեղասպանության հարցում Իսրայելի դիրքորոշման մեջ փոփոխության սկիզբ դառնալ:

Աղբյուր` Ermenihaber.am