Թուրքիայում պատրաստվում են քանդել հայկական որբանոցը և կառուցել շքեղ ամառանոցներ

Տարածաշրջան07:50, 29 Ապրիլ 2015

Թուրքիայում պատրաստվում են քանդել հայկական որբանոցը և կառուցել շքեղ ամառանոցներ

Ստամբուլի Թուզլա շրջանում գտնվող ամառային ճամբար-մանկատունը, որտեղ բազմաթիվ հայ որբերի թվում ապրել են Հրանտ Դինքը և նրա կին Ռաքել Դինքը, քանդվելու է:

Այս մասին գրում է թուրքական «internethaber» լրատվական կայքը, նշելով, որ տեղեկությունը հաղորդել է Կարապետ Օնուրօզը, ով Հրանտ Դինքի հետ միասին ժամանակին ապրել է նշյալ ճամբարում: Օնուրօզը հայտնել է նաև, որ քանդելուց հետո այստեղ նախատեսվում է շքեղ առանձնատներ կառուցել:

Թուրքիայում 4 տարի առաջ օրենք է ընդունվել փոքրամասնություններին պատկանող հիմնադրամների` արդեն 79 տարի բռնագրավված անշարժ գույքերի վերադարձման մասին: Սակայն Թուզլայում գտնվող ամառային ճամբարը, որը կցված է Ստամբուլի Գեդիքփաշա թաղամասում գտնվող մանկատանը, չի ընդգրկվել օրենքով վերադարձման ենթակա գույքերի ցուցակում:

Կարապետ Օնուրօզը տեղեկացրել է, որ Թուզլայում գտնվող որբանոցը, որը հիմնականում, որպես ամառային ճամբար է օգտագործվել և ունի 5.552 քմ տարածք, 1961 թվականին գնվել է Հայ բողոքական եկեղեցու հիմնադրամի կողմից:

«1962 թվականին սկսվել է ամառային ճամբարի շինարարությունը, ինչի համար Հիմնադրամի գլխավոր վարչությունից թույլտվություն է վերցվել: Հողատարածքի սեփականատերն էլ եղել է Սաիթ Դուրմազի ընտանիքը: Նրանց էլ համապատասխան գինը վճարվել է և գնվել տարածքը: Դուրմազի երեխաներից մեկը գնել է այդ տարածքից 600քմ հողատարածք: 1977 թվականին այդ 600 քմ տարածքը գնած կապալառուի կողմից բացված դատական գործընթացի արդյունքում կարողացել է ինչ-ինչ ճանապարհով ճամբարի տարածքը կցել իր կողմից գնվող 600քմ-ին: 1974 թվականին ընդունված փոքրամասնությունների հիմնադրամների մասին նոր օրենքով այդ ճամբարը բռնագրավվել է»,- տեղեկացրել է Օնուրօզը:

Աղբյուր` Ermenihaber.am