Սիրիայի ԱԳՆ-ն դատապարտել է ահաբեկիչներին աջակցող Թուրքայի գործողությունները

Քաղաքական10:31, 29 Ապրիլ 2015

Սիրիայի ԱԳՆ-ն դատապարտել է ահաբեկիչներին աջակցող Թուրքայի գործողությունները

Սիրիայի արտաքին գործերի նախարարությունը Թուրքիային մեղադրել է Սիրիայի Իդլիփ և Ջիսր քաղաքներում ռազմական գործողություններ իրականացնող ահաբեկչական կազմակերպություններին օժանդակելու մեջ:
Ըստ թուրքական «Ulusal kanal» լրատվական կայքի` Սիրիայի արտաքին գործերի նախարարությունը մասնավորապես նշել է, որ «Ալ-Նուսրա» իսլամական ծայրահեղ ահաբեկչական կազմակերպությունն աջակցություն է ստանում Թուրքիայից:

«Ահաբեկչական կազմակերպությունների հարձակումներն իրականացվում են թուրքական բանակի թիկունքային և կրակային աջակցությամբ»,- նշված է Սիրիայի ԱԳՆ-ի հայտարարության մեջ: Նաև ընդգծվում է, որ Թուրքիայի ցուցաբերած աջակցությունը Սիրիայի իշխանությունների դեմ պատերազմող ահաբեկչական կազմակերպություններին, ուղղակիորեն որակվում է որպես հարձակում Սիրիայի վրա:

Տեղեկացնենք, որ օրեր առաջ «Ալ-Նուսրա»-ն իր վերահսկողության տակ էր վերցրել, Սիրիայի Իդլիփ քաղաքից 55 կմ հեռավորության վրա գտնվող Ջիսր քաղաքը: