Թուրքական օդանավակայանը ծովի վրա կառուցված լինելու առումով 3-րդն է աշխարհում

Տարածաշրջան10:28, 05 Մայիս 2015

Թուրքական օդանավակայանը ծովի վրա կառուցված լինելու առումով 3-րդն է աշխարհում

Ավարտվել են Թուրքիայի 53-րդ օդանավակայանի կառուցման աշխատանքները: Մայիսի 22-ին կայանալիք բացման արարողությանը ակնկալվում է Թուրքիայի նախագահ Ռեջեփ Թայիփ Էրդողանի և վարչապետ Ահմեթ Դավութօղլուի մասնակցությունը: Թուրքական իշխանամետ «Սաբահ» պարբերականի համաձայն՝ Օրդու նահանգի Գիրեսունի նորակառույց օդանավակայանը լինելու է միակը Եվրոպայում, որը կառուցվել է ծովի վրա՝ արհեստական հիմք ստեղծելու՝ ծովը լցնելու միջոցով:

Թուրքական «Անադոլու» լրատվական գործակալության հետ զրույցում Օրդուի նահանգապետ Իրֆան Բալքանլըօղլուն ասել է.«Այսպիսի օդանավակայաններ Եվրոպայում և Թուրքիայում ընդհանրապես չկան,իսկ ամբողջ աշխարհում այսպիսինները կան միայն Ճապոնիայում և Հոնկկոնգում: Այս տեսակետից մեր նոր օդանավակայանը ծովի վրա կառուցված աշխարհի երրորդ օդանավակայանը կլինի»:

Բալքանլըօղլուի վկայությամբ՝ օդանավակայանի կառուցման համար ծովի մեջ 35 մլն տոննա քար է լցվել և 18.000 հեկտար ջրային մակերեսով տարածք վերածվել է ցամաքի: Օրդուի նահանգապետը համոզված է, որ օդանավակայանը ընդունակ է դիմանալու Սև ծովի հուժկու ալիքներին և, ընդհանրապես, կառուցված է ժամանակակից տեխնոլոգիաների կիրառմամբ:

Նշվում է, որ օդանավակայանի կառուցման համար ընդհանուր առմամբ ծախսվել է 360 մլն լիրա (133 մլն դոլար):

Օրդուի նահանգապետի հավաստմամբ՝ նորակառույց օդանավականը թռիչքների պատրաստ կլինի մայիսի 26-ից: Ակնկալվում է, որ սա մեծապես կնպաստի Օրդու նահանգում զբոսաշրջության զարգացմանը:

Աղբյուր` Ermenihaber.am