Թուրքիան բանտարկյալների թվով 10-րդն է ողջ աշխարհում

Տարածաշրջան14:09, 05 Մայիս 2015

Թուրքիան բանտարկյալների թվով 10-րդն է ողջ աշխարհում

Ըստ ամենամարդաշատ բանտերի ցուցանիշի` Թուրքիան աշխարհում զբաղեցնում է 10-րդ տեղը: Թուրքական «rotahaber.com»-ն այս առթիվ գրում է. «Վերջին ժամանակներս Թուրքիան վերածվել է բացօթյա բանտի: Տեղական ընտրություններում իշխանությունների՝ քաղաքներին տված ամենամեծ խոստումը նոր բանտերի կառուցումն էր, քանի որ Թուրքիայի բանտերում տեղ չի մնացել: Մի շարք քրգործեր այդ պատճառով տարիներ շարունակ չեն ավարտվում»:

Աղբյուրի վկայությամբ՝ աշխարհի ամենամարդաշատ բանտերը գտնվում են Միացյալ նահանգներում: Մի հետազոտության համաձայն՝ ԱՄՆ-ի բանտերում 2 մլն 217 հազար բանտարկյալ կա, որոնց մեջ մեծ թիվ են կազմում սևամորթները:

Ըստ նշյալ ցուցանիշի՝ 2-րդ տեղում հայտնվել է Չինաստանը, որի բանտերում 1 մլն 657 հազար մարդ կա: Երրորդ տեղում Ռուսաստանն է՝ 673 հազար բանտարկյալներով:

Տասնյակի մյուս հորիզոնականները համապատասխանաբար զբաղեցնում են Բրազիլիան (581 հազար), Հնդկաստանը (411 հազար), Թայլանդը (331 հազար), Մեքսիկան (255 հազար), Իրանը (225 հազար), Ինդոնեզիան (167 հազար) և Թուրքիան (165 հազար):

Ըստ թուրքական կայքի՝ Թուրքիայի այս ցուցանիշը վերջին 10 տարիների ընթացքում աննախադեպ աճել է: Ի դեպ, նույն ուսումնասիրության տվյալների համաձայն՝ Ադրբեջանը գտնվում է 60-րդ հորիզոնականում (20.669 բանտարկյալ), իսկ Հայաստանը՝ 125-րդ հորիզոնականում (3.923 բանտարկյալ):

Աղբյուր` Ermenihaber.am