ERMENI HABER AJANSI

Թուրքիայի վարչապետ Ահմեթ Դավութօղլուն նախընտրական հանրահավաքներ է անցկացրել Չանաքքալեում (Դարդանել) և Թեքիրդաղում: Թուրքական «rotahaber.com» լրատվակայքի փոխանցմամբ՝ ելույթի ժամանակ Դավութօղլուն ուշագրավ հայտարարություններ է արել:

«Գոյություն ունի երեք անօրինական բանդա: Դրանցից մեկը «զուգահեռ կառույցն» է: (Այդպես են կոչում ԱՄՆ-ի Փենսիլվանիա նահանգում բնակվող թուրք միլիարդատեր Ֆեթուլլահ Գյուլենի ղեկավարած  հզոր իսլամական շարժումը- խմբ.): Մեկ տեսնում ենք՝ Փենսիլվանիայի ներկայացուցիչը Դիարբեքիրում ելույթ է ունենում «Ժողովուրդների դեմոկրատական» կուսակցության (ԺԴԿ-HDP) հետ, մեկ տեսնում ենք՝ Քըլըչդարօղլուն է գնում նրանց  խմբագրություն, մեկ տեսնում ենք՝ նրանք Բահչելիի մոտ են գնում: Վարագույրի հետում սրանք բոլորը կապված են իրար հետ:

Երկրորդը  Քանդիլն է, այսինքն՝ «Քուրդիստանի բանվորական կուսակցությունը» (ՔԲԿ-PKK), որն ամեն օր հայտարարություններով ու սպառնալիքներով է հանդես գալիս:

Իսկ երրորդը  «Հեղափոխական ժողովրդական ազատագրական կուսակցություն-ճակատ»  (ՀԺԱԿՃ-DHKP-C) ահաբեկչական կազմակերպությունն է, որը պատասխանատու է Ադանայի և Մերսինի ահաբեկչությունների համար», - ասել է Դավութօղլուն:

Նրա կարծիքով՝ այդ կազմակերպությունների՝ «զուգահեռ կառույցի», ՔԲԿ-ի, ՀԺԱԿՃ-ի և Թուրքիայի ընդդիմադիր կուսակցությունների՝ «Ժողովրդահանրապետական» կուսակցութան (ԺՀԿ-CHP), «Ազգայնական շարժում» կուսակցության  (ԱԺԿ-MHP) և ԺԴԿ-ի միջև որոշակի համագործակցություն և ընդհանրություն կա: Ըստ նրա՝ հիշյալ վեցը միասին իշխանական «Արդարություն և զարգացում» կուսակցության (ԱԶԿ-AKP) դեմ են դուրս եկել: Դավութօղլուն կոչ է արել հունիսի 7-ի ընտրություններում մի լավ դաս տալ իր բնութագրմամբ «զուգահեռ վեցնյակին», որը «ցանկանում է կասեցնել ԱԶԿ-ի և Թուրքիայի վերելքը»:

Թուրքիայի վարչապետը անդրադարձել է նաև այլ խնդիրների՝ մասնավորապես նշելով, որ անհրաժեշտ է խթանել Թուրքիայում  երիտասարդների վաղ ամուսնությունները, ինչպես նաև՝ նպաստել, որպեսզի կանայք և երեխաներ ունենան, և կարողանան աշխատել: