Թուրքիան Գազային 75.6 մլն. դոլարի օգնություն է տրամադրել

Տարածաշրջան14:05, 27 Մայիս 2015

Թուրքիան Գազային 75.6 մլն. դոլարի օգնություն է տրամադրել

Թուրքիայի արտգործնախարարության (ԱԳՆ) խոսնակ Թանժու Բիլգիչը հայտարարել է, որ այս տարի Թուրքիայի կողմից Գազայի տարածք ուղարկված և ծրագրվող մարդասիրական օգնությունը կազմել է 75.6 մլն դոլար: Ըստ թուրք պաշտոնյայի՝ վերջին 10 տարվա ընթացքում Թուրքիան արդեն 369 մլն դոլարի օգնություն է տրամադրել Գազային:

Թուրքական «trthaber.com» լրատվականի համաձայն՝ նախորդ տարի ևս շուրջ 76.3 մլն դոլարի օգնություն է ուղարկվել Պաղեստին: Դրանից 59.2 մլն դոլարը պաշտոնական օգնության տեսքով է ուղարկվել, 17.1 միլիոնը՝ քաղաքացիական օգնության:

Թանժու Բիլգիչը նշել է, որ Իսրայելի կողմից Գազայի ուղղությամբ կատարված հարձակումների բացասական հետևանքների վերացման նպատակով 2014թ. հոկտեմբերի 12-ին Կահիրեում կազմակերպվել է «Գազայի վերակառուցման վերաբերյալ պաղեստինյան գիտաժողով», որի շրջանակներում Թուրքիան պարտավորվել է 2015- 2017թթ. Գազային տրամադրել 200 մլն դոլարի օգնություն:

«2015թ. մեր երկրի կողմից Գազային տրամադրված և ծրագրվող օգնության ծավալը կազմել է 75.6 մլն դոլար: Ինչպես տեսնում եք, մեր երկիրն անում է այն, ինչ պարտավոր է անել և մեր պաղեստինցի ընկերների կարիքները հոգալու համար տարվող աշխարանքներն անդադար շարունակվում են», - ասել է Թուրքիայի ԱԳՆ խոսնակը:

Նշվում է նաև, որ «Իսլամական համագործակցության ժողովին» մասնակցելու նպատակով Քուվեյթում գտնվող Թուրքիայի արտգործնախարար Մևլութ Չավուշօղլուն հանդիպել է պաղեստինցի իր պաշտոնակից Ռիյադ Մալկիի հետ: Աղբյուրի վկայությամբ՝ հանդիպման ժամանակ Մալկին շնորհակալություն է հայտնել Չավուշօղլուին՝ Թուրքիայի տրամադրած մարդասիրական օգնության համար:

Աղբյուր` Ermenihaber.am