ERMENI HABER AJANSI

Թուրքական հեռուստաեթերում հունիսի 7-ի խորհրդարանական ընտրություններից առաջ անհավասար քարոզարշավ է ընթանում: Թուրքական ընդդիմադիր «t24.com.tr» կայքը նկատել է տալիս, որ հանրային համարվող և հասարակության համար լրատվություն կազմակերպելու պարտավորություն ունեցող TRT  հեռուտաալիքը նախընտրական քարոզարշավի շրջանակներում անհամեմատ ավելի շատ եթերաժամանակ է տրամադրում Էրդողանին և իշխող «Արդարություն և զարգացում« կուակցությանը (ԱԶԿ – AKP), քան բոլոր ընդդիմադիր ուժերին`

«Ժողովրդահանրապետական» (ԺՀԿ-CHP) կուսակցություն,

«Ժողովուրդների դեմոկրատական» (ԺԴԿ-HDP) կուսակցություն,

«Ազգայնական շարժում» (ԱՇԿ-MHP) կուսակցություն:

Անգամ թուրքական  իշխանությանը մոտ կանգնած «Ռադիոյի և հեռուստատեսության բարձրագույն խորհրդի» իրականացրած հետազոտությունը փաստում է, որ վերջին մեկ ամսվա ընթացքում TRT-ի եթերում Թուրքիայի նախագահ Թայիփ Էրդողանին տրամադրվել է 45 ժամ, ԱԶԿ-ին՝ 54.5 ժամ, ԺՀԿ-ին՝ 14 ժամ, ԱՇԿ-ին՝ 7.5 ժամ, իսկ ԺԴԿ-ին՝ 3 ժամ:

Թուրքական «Dicle» լրատվական գործակալության համաձայն՝ նախընտրական քարոզարշավի սկզբից՝ ապրիլի 1-ից մինչև հունիսի 3-ն ընկած ժամանակահատվածում եթերում հեռարձակված հաղորդումների, հատուկ ռեպորտաժների և հանրահավաքների ուղիղ միացումների՝ ԱԶԿ-ին տրամադրված ընդհանուր ժամաքանակը կազմել է 168 ժամ:

Նույն ժամանակահատվածում TRT–ի եթերում հեռարձակված 42 հաղորդումներից 22-ին հյուրընկալվել են իշխանության և ԱԶԿ-ի անդամներ, խոսնակներ, թեկնածուներ: Մյու 20 հաղորդումներին ևս, պարզվում է, մասնակցել են ԱԶԿ-ին մոտ կանգնած  մտավորականներ, լրագրողներ, ակտիվիստներ: Ընդդիմադիր կուսակցությունների ներկայացուցիչներն այս հաղորդումներին չեն մասնակցել:

«Ռադիոյի և հեռուստատեսության բարձրագույն խորհրդի» անդամ Էրսին Օնգելը հայտարարել է, որ TRT-ի վարած այս քաղաքականությունը հակասում է Թուրքիայի Բարձրագույն ընտրական հանձնաժողովի՝ անկողմնակալության և կուսակցությունների համար հավասար հնարավորություններ ապահովելու պահանջին և TRT–ն փաստորեն զբաղվել է ԱԶԿ-ի գովազդմամբ: