Դեմիրթաշը մեկնաբանել է Դիարբեքիրում տեղի ունեցած պայթյունները

Քաղաքական08:08, 06 Հունիս 2015

Դեմիրթաշը մեկնաբանել է Դիարբեքիրում տեղի ունեցած պայթյունները

Թուրքիայի ընդդիմադիր «Ժողովուրդների դեմոկրատական» կուսակցության (ԺԴԿ–HDP) համանախագահ Սելահաթթին Դեմիրթաշը մեկնաբանել է հունիսի 5-ին Դիարբեքիրում կայացած ԺԴԿ-ի հանրահավաքի ժամանակ տեղի ունեցած պայթյունները:

Թուրքական «hyurriyet» պարբերականի տեղեկացմամբ՝ Դեմիրթաշը նախ իր ցավակցությունն է հայտնել բոլոր տուժածներին և ողջ ժողովրդին՝ ընդգծելով, որ հավասարակշռվածություն պահպանելուց բացի իրենք որևէ այլընտրանք չունեն:

«Թող բոլորը հանգիստ լինեն: HDP-ն նմանատիպ թակարդների մեջ չի ընկնի: Մենք կմասնակցենք խորհրդարանական ընտրություններին, ու տա Աստված, հաղթենք»:

Դեմիրթաշը հայտարարել է, որ Թուրքիային այսօր հաց ու ջրից առավել խաղաղություն է պետք և կոչ է արել ժողովրդին՝ տեղի չտալ սադրանքներին ու լարվածություն չստեղծել երկրում` անկախ նրանից, թե ովքեր են պայթյունների հեղինակները: Նա միաժամանակ ընդգծել է, որ բավական խանդավառ ու ոգևորված հանրահավաքի ավարտին նման արյունոտ միջադեպն իրոք մտածելու տեղիք է տալիս:

«Ես Դիարբեքիրի բնակիչներին կոչ եմ անում պահպանել սթափ դատողությունը: Մենք կշարունակենք ընտրությունների նախապատրաստությունները: Հուսով եմ, որ այդ պայթյունները բացահայտելու համար լուրջ հետաքննություն կիրականացվի և արդյունքները բոլորիս կբավարարեն»,-ասել է ԺԴԿ համանախագահը:

Աղբյուր` Ermenihaber.am