Էրդողանը Դիարբեքիրի պայթյունների վերաբերյալ հայտարարություն է արել

Տարածաշրջան08:00, 06 Հունիս 2015

Էրդողանը Դիարբեքիրի պայթյունների վերաբերյալ հայտարարություն է արել

Հունիսի 5-ի երեկոյան Թուրքիայի Դիարբեքիր քաղաքում ընդդիմադիր, քրդամետ «Ժողովուրդների դեմոկրատական» կուսակցության (HDP-ԺԴԿ) նախընտրական հանրահավաքի ժամանակ տեղի ունեցած պայթյունների վերաբերյալ հայտարարությամբ է հանդես եկել Թուրքիայի նախագահ Ռեջեփ Թայիփ Էրդողանը:

Վերջինս հայտարարության մեջ նշել է, որ պայթյունի իրականացման վերաբերյալ տարբեր վարկածներ կան ու այս պահին աշխատանքները շարունակվում են` պարզելու բոլոր հանգամանքները և առայժմ վաղ է որևէ բան ասել այդ թեմայով:

«Մեզ վշտացրեց նաև Սիիրթում մեր գյուղապետի սպանությունը, ինչպես նաև Շըրնաքում ևս երկու հոգու սպանությունը: Բոլոր այս դեպքերը հաշվի առնելով` պետք է ասեմ, որ ցավոք այս նախընտրական շրջանը շատ բացասական կողմեր ունեցավ: Սակայն այս (Դիրարբեքիրի պայթյունը) դեպքը, որը տեղի ունեցավ ընտրություններից 2 օր առաջ, լրջորեն կստվերի ընտրությունները»,- նշել է Էրդողանը:

Էրդողանն ասել է նաև, որ իրենք կանեն հնարավորը, որպեսզի ընտրություններն անցնեն բարձր մակարդակով` միաժամանակ ավելացնելով, որ քաղաքական կուսակցությունների ղեկավարներն իրենց ընտրազանգվածներին պետք է հանդարտության կոչ անեն:

Երկրի նախագահը հայտարարությունը եզրափակել է մահացածներին հոգու հանգստություն, իսկ վիրավորներին շուտափույթ ապաքինում մաղթելով:

Հիշեցնենք, որ պաշտոնական տվյալներով պայթյունի արդյունքում կա 2 զոհ և 150-ից ավելի վիրավոր:

Աղբյուր` Ermenihaber.am