Գորշ գայլերի քաղաքական թև «MHP» կուսակցությունը կոալիցիա չի կազմի Էրդողանի կուսակցության հետ

Տարածաշրջան07:43, 08 Հունիս 2015

Գորշ գայլերի քաղաքական թև «MHP» կուսակցությունը կոալիցիա չի կազմի Էրդողանի կուսակցության հետ

Թուրքիայում հունիսի 7-ին անցկացված խորհրդարանական ընտրությունների նախնական տվյալներով` իշխող «Արդարություն և զարգացում» կուսակցությունը (ԱԶԿ-AKP) հավաքելով ընդամենը 40.7 տոկոս ձայն, զրկվել է միանձնյա կառավարություն ձևավորելու հնարավորությունից:

Նախնական արդյունքների հրապարակումից հետո թուրքական լրատվամիջոցներում շրջանառվում են լուրեր կոլաիցիայի հնարավոր տարբերակների մասին, որոնց թվում քննարկվում է նաև ընդդիմադիր «Ազգայնական շարժում» կուսակցության (ԱՇԿ-MHP) հետ համատեղ կառավություն կազմելու տարբերակը:

Սակայն, այսօր գորշ գայլերի քաղաքական թևը համարվող ԱՇԿ-ի նախագահ Դևլեթ Բահչելին բացառել է ԱԶԿ-ի հետ կոալիցիա կազմելու հավանականությունը:

Թուրքական «Milliyet» թերթի տեղեկացմամբ՝ Բահչելին կոալիցիայի համար ԱԶԿ-ին հարմար 2 տարբերակ է մատնանշել՝ ընդգծելով, որ երկիրը դեպի անկայունություն չտանելու, տնտեսական դժվարությունների առաջ չկանգնեցնելու համար անհրաժեշտ է համատեղ կառավարություն կազմել: Ըստ առաջին տարբերակի՝ ԱԶԿ-ն կարող է համագործակցել քրդամետ «Ժողովուրդների դեմոկրատական» կուսակցության (ԺԴԿ-HDPO) հետ, քանի որ երկուսն էլ քրդական հարցի լուծման կողմնակիցներն ու բանակցողներն են: Երկրորդ տարբերակը համագործակցությունն է «Ժողովրդահանրապետական կուսակցության» (ԺՀԿ-CHP), ԱԶԿ-ի և ԺԴԿ-ի միջև: Բահչելիի բնորոշմամբ այս երեք քաղաքական ուժերին էլ «առաջադիմականներ» են:

Բահչելիի խոսքերով խնդրի նման լուծման դեպքում իր կուսակցությունը մեծ պատվով կստանձնի գլխավոր ընդդիմադիր ուժի պարտականությունը: Կոալիցիա չկազմելու պարագայում Բահչելին շեշտել է արտահերթ ընտրություններ անցկացնելու անրաժեշտությունը:

Աղբյուր` Ermenihaber.am