Թուրքիայի նորընտիր խորհրդարանի ժամանակավոր ղեկավարը կլինի սեքս-սկանդալի նախկին հերոսը

Քաղաքական08:47, 08 Հունիս 2015

Թուրքիայի նորընտիր խորհրդարանի ժամանակավոր ղեկավարը կլինի սեքս-սկանդալի նախկին հերոսը

Թուրքիայի 25-րդ գումարման խորհրդարանի ժամանակավոր նախագահ կլինի գլխավոր ընդդիմության` «Ժողովրդահանրապետական կուսակցության» (ԺՀԿ-CHP) նախկին ղեկավար Դենիզ Բայքալը:

Ինչպես հայտնում է թուրքական իշխանություններին մոտ կանգնած «Aksam» պարբերականի կայքը, մինչև Թուրքիայի ազգային մեծ ժողովի (ԹԱՄԺ-TBMM) նախագահի ընտրությունները, խորհրդարանի աշխատանքները կղեկավարի ամենատարեց պատգամավորը, տվյալ դեպքում` 77-ամյա Դենիզ Բայքալը:

Նա պատգամավորի մանդատ է ունեցել Թուրքիայի 15-րդ, 16-րդ, 18-րդ, 19-րդ 20-րդ, 22-րդ, 23-րդ և 24-րդ գումարման խորհրդարաններում:

Հիշեցնենք, որ 5 տարի առաջ Բայքալը, հայտնվելով սեքս-սկանդալի մեջ, հրաժարվել էր կուսակցապետությունից: Համացանցում տարածվել էր Բայքալի և նրա ղեկավարած կուսակցության անդամ, կին պատգամավոր Նեսրին Բայթոքի միջև սեռական հարաբերությունների տեսագրությունը, որ նկարահանվել էր թաքնված տեսախցիկով: Բայքալը հայտարարել էր, որ դա իր դեմ կազմակերպված դավադրություն է եղել:

Աղբյուր` Ermenihaber.am