Գորշ գայլերի կուսակցությունը իշխանությունների հետ կոալիցիա կկազմի, եթե…

Քաղաքական11:28, 09 Հունիս 2015

Գորշ գայլերի կուսակցությունը իշխանությունների հետ կոալիցիա կկազմի, եթե…

Թուրքիայում կոալիցիոն կառավարություն կազմելու շուրջ քննարկումները շարունակվում են: «Ազգայնական շարժում» կուսակցության (ԱՇԿ-MHP) նախագահ Դևլեթ Բահչելին նախօրեին բացառել էր իր կուսակցության կոալիցիայի մեջ մտնելու հավանականությունը: Մինչդեռ այսօր հայտնել է այն պայմանները, որոնց ընդունման դեպքում իշանությունների հետ կոալիցիա կկազմեն:

Ինչպես տեղեկացնում է թուրքական «Sonhaber» լրատվական կայքը, ԱՇԿ-ն ներկայացրել է 3 պայման: Թուրքական կայքը հայտնում է, որ Բահչելին կհանդիպի վարչապետ Ահմեթ Դավութօղլուի հետ, եթե վերջինս կառավարություն կազմելու իրավասություն ստանալուց հետո դիմի ԱՇԿ-ին: Դավութօղլու-Բահչելի հնարավոր հանդիպման ժամանակ էլ կներկայացվեն ԱՇԿ-ի համար անընդունելի կետերը.

1. Հրաժարում նախագահական կառավարման համակարգին անցնելու մտքից:

Այսինքն՝ Թուրքիան պետք է շարունակի մնալ խորհրդարանական երկիր:

2. Թուրքիայի վարչական բաժանման փոփոխություններ չպետք է լինեն:

Այս կետը պահանջում է, որ անգամ սահամանադրական բարեփոխումների շարունակման դեպքում թուրքական ինքնության և Թուրքիայի վարչական կառուցվածքին առնչվող փոփոխություններ չառաջարկվեն:

3. Քրդական հարցի կարգավորման գործընթացը պետք է դադարեցվի:

Ըստ «Գորշ գայլեր»-ի քաղաքական թևը համարվող ԱՇԿ-ի` քրդական կարգավորման գործընթացը որևէ օգուտ չի տվել, փոխարենը ահաբեկչությանը հնարավորություն է ընդլայնել իր քաղաքական շրջանականները:

Աղբյուր` Ermenihaber.am