Դիարբեքիրի հայկական եկեղեցին արժանացել է «ԵՄ մշակութային ժառանգության» մրցանակին

Մշակութային10:07, 12 Հունիս 2015

Դիարբեքիրի հայկական եկեղեցին արժանացել է «ԵՄ մշակութային ժառանգության» մրցանակին

Նախօրեին Նորվեգիայի մայրաքաղաք Օսլոում կայացել է «Եվրամիության մշակութային ժառանգություն և Europa Nostra» մրցանակաբաշխության հանդիսավոր արարողությունը:

Թուրքական «turkiyeturizm.com» կայքի հաղորդմամբ` մրցանակաբաշխության շրջանակներում Դիարբեքիրի Սուրբ Կիրակոս հայկական եկեղեցուն շնորհվել է «Մեծ մրցանակ»:

Աղբյուրը նշում է, որ ժյուրիի անդամների այդ որոշման համար հիմնական դրդապատճառ է հանդիսացել կիսաավեր եկեղեցու վերականգնման գործում հայ համայնքի և տեղի բնակչության ու պաշտոնյաների համագործակցությունը, ինչը դիտվել է համերախության օրինակ:

Մրցանակաբաշխությանը ներկայացված են եղել բազմաթիվ մշակութային նախագծեր, որոնց ուսումնասիրություններին մասնակցել են աշխարհի տարբեր երկրներից ժամանած մշակութային ժառանգության 600 մասնագետ և բազմաթիվ կամավորներ: Միջոցառմանն իրենց մասնակցությունն են բերել նաև Օսլոյի քաղաքապետն ու Նորվեգիայի բնապահպանության նախարարը:

Միջոցառմանն ընդհանուր առմամբ շնորհվել է 7 «Մեծ մրցանակ», որոնցից մեկը բաժին է հասել Դիարբեքիրի Սուրբ Կիրակոս հայկական եկեղեցուն:

Աղբյուր` Ermenihaber.am