Թուրքիայից ԻՊ-ին անդամակցող քաղաքացիները հիմնականում 20-22 տարեկան են

Տարածաշրջան08:16, 19 Հունիս 2015

Թուրքիայից ԻՊ-ին անդամակցող քաղաքացիները հիմնականում 20-22 տարեկան են

Թուրքիայի քաղաքացի 25-ամյա Հյուսեին Մուստաֆա Փերին մի տեագրություն է ուղարկել «Al Monitor»-ի լրագրող Ամբերին Զամանին, որտեղ պատմում է, թե նախկինում եղել է «Իսլամական պետություն» (İŞİD) ահաբեկչական խմբավորման գրոհայինների շարքում:

Հյուսեինը առաջ է քաշել այն պնդումը, թե Մուսուլի հյուպատոսարանից առևանգվածների ազատ արձակման վերաբերյալ Անկարան ԻՊ-ի հետ փոխանակման պայմանավորվածություն է ձեռք բերել: Զամանը փորձել է ստուգել իրեն ուղարկված տեսանյութում նշված փաստերի իսկությունը, սակայն տեսանյութի հեղինակի մասին ոչինչ պարզել չի կարողացել:

Ըստ աղբյուրի՝ «տեսանյութում Մուսթաֆա Փերին նկարագրում է ԻՊ-ի անդամ մի քաղաքացու օգնությամբ Թուրքիայից մեկնելու և ԻՊ-ին միանալու ընթացքը՝ նշելով, որ այն հեշտ ու անարգել է անցել: Սիրիա հասնելուց հետո նրան և այլ նոր անդամների խմբավորել են՝ ըստ ազգային պատկանելիության, հետո կրոնի դասեր են անցել, ինչից հետո թուրքերից բաղկացած մի ստորաբաժանում է ձևավորվել»:

Ըստ տեսանյութի հերոսի՝ Թուրքիայից ԻՊ-ին անդամակցող քաղաքացիները հիմնականում 20-22 տարիքային խմբին են պատկանում: Նա մասնավորապես նշել է, որ ԻՊ-ի կազմում կան Քոնիա քաղաքի բնակիչներ: Նա նշել է Քոնիայում գործող կրոնական կազմավորումների և դրանց առաջնորդների անունները՝ պնդելով, որ դրանք «ջիհադի» կազմավորումներ են և տեսակետ է հայտնել, թե պետությունն ուղղակի չի կարող չիմանալ նրանց գոյության մասին:

«Փերին նշել է, որ ԻՊ-ի վերահսկողության տակ գտնվող երկրներում Թուրքական տարբեր ապրանքներ են վաճառվում, ինչը շատ զարմանալի է այն դեպքում, երբ ԻՊ-ը Թուրքիային վերաբերվում է որպես «հայհոյանքի երկիր»: Ըստ նախկին գրոհայինի մեկնաբանության՝ դա տեղի է ունենում ԻՊ-ի կողմից գերեվարված թուրքերի հետ փոխանակման շնորհիվ», - գրում է կայքը:

Աղբյուր` Ermenihaber.am