Անի պատմական քաղաքը ՅՈՒՆԵՍԿՕ-ի կողմից կարող է ճանաչվել համաշխարհային ժառանգություն

Մշակութային07:21, 14 Հուլիս 2015

Անի պատմական քաղաքը ՅՈՒՆԵՍԿՕ-ի կողմից կարող է ճանաչվել համաշխարհային ժառանգություն

Թուրքիայում, Կարսի նահանգի Մշակույթի և զբոսաշրջության վարչության պետ Հաքան Դողանայը «Անադոլու» լրատվական գործակալությանը տեղեկացրել է, որ իրենք աշխատանքներ են տանում, որպեսզի պատմական Անի քաղաքը ՅՈՒՆԵՍԿՕ-ի կողմից ճանաչվի որպես համաշխարհային ժառանգություն:

Դողանայը, նշելով որ Անին զբոսաշրջիկների սիրելի վայրերից մեկն է , ավելացրել է. «Այս տարվա փետրվար ամսին դիմեցինք ՅՈՒՆԵՍԿՕ-ին և Անին ընդգրկվեց ժամանակավոր ցուցակում: Քաղաքը, ՅՈՒՆԵՍԿՕ-ի համաշխարհային ժառանգության հիմնական ցուցակում ընդգրկելու համար շարունակում ենք աշխատանքներ տանել:»

Խոսելով հետագա քայլերի մասին` թուրք պաշտոնյան նշել է, որ շուտով ՅՈՒՆԵՍԿՕ-ի կողմից հատուկ պատվիրակություն կժամանի Անի և տեղում ուսումնասիրություններ կանի:

Նշենք, որ Անին, Հայաստանի միջնադարյան մայրաքաղաքներից մեկը է, գտնվում է Ախուրյան գետի աջ ափին, եռանկյունաձև սարահարթի վրա։ Տարածքը բնակելի է եղել անհիշելի ժամանակներից, սկզբնապես մտել է Կամսարական նախարարական տան կալվածքների մեջ։ Իսկ 961 թ Բագրատունիները այն հռչակեցին մայրաքաղաք։

Անին հայտնի էր իր եկեղեցիներով։ Միայն պալատական համալիրի մեջ մտնում էր 7 եկեղեցիներ, որոնցից ամենավեհասքանչը Մայր տաճար Սուրբ Աստվածածին եկեղեցին էր։ Անիի այլ հայտնի եկեղեցիներն էին՝ Անիի Սուրբ Առաքելոցը, Ս. Փրկիչը, Տիգրան Հոնենցու, Մանուչեի եկեղեցիները։ Վերջինս հետագայում վերածվել է մզկիթի։Ներկայումս պահպանվել են միայն այս եկեղեցիների ավերակները:

Աղբյուր` Ermenihaber.am