Թուրքիայի ընդդիմադիր «Ազգայնական շարժում» կուսակցությունը հրաժարվել է կոալիցիա կազմել

Տարածաշրջան14:31, 14 Հուլիս 2015

Թուրքիայի ընդդիմադիր «Ազգայնական շարժում» կուսակցությունը հրաժարվել է կոալիցիա կազմել

Թուրքիայում շարունակվում են հունիսի 7-ին կայացած խորհրդարանական ընտրություններից հետո կառավարություն ձևավորելու շուրջ բանակցությունները: Թուրքական «Sabah» թերթը հայտնում է, որ Թուրքիայի վարչապետ և իշխող «Արդարություն և զարգացում» կուսակցության (AKP-ԱԶԿ) նախագահ Ահմեթ Դավութօղլուն հանդիպել է ընդդիմադիր «Ազգայնական շարժում» կուսակցության (MHP-ԱՇԿ) առաջնորդ Դևլեթ Բահչելիի հետ:1 ժամ 40 րոպե տևած հանդիպումից հետո Դավութօղլուն հայտարարություն է արել հանդիպման արդյունքների մասին:

Դավութօղլուն նշել է, որ բավականին անկեղծ հանդիպման ժամանակ Բահչելին ներկայացրել է իր տեսակետները և վերահաստատել է կառավարությունում չընդգրկվելու որոշումը:

«ԱԶԿ» դիրքորոշումը ներկայացնելիս Դավութօղլուն հայտնել է, որ փորձում են ճիշտ կերպով գնահատել խորհրդարանական ընտրություններից հետո ստեղծված իրավիճակը: «Աշխատում ենք, որ ոչ մի դուռ չփակվի»,- ասել է վարչապետը՝ ընդգծելով, որ բոլոր կուսակցությունների նկատմամբ նույն մոտեցումն ունեն այնքան ժամանակ, քանի դեռ որևէ մեկի հետ կոալիցիայի շուրջ համաձայնության չեն եկել և արձանագրություն չեն ստորագրել:

Աղբյուր` Ermenihaber.am