Էրզրումում քուրդ զինյալները մեքենաներ են հրկիզել (լուսանկարներ)

11:33, 27 Հուլիս 2015

Էրզրումում քուրդ զինյալները մեքենաներ են հրկիզել (լուսանկարներ)

«Քուրդիստանի բանվորական կուսակցության» (ՔԲԿ-PKK) զինյալները գիշերը՝ Թուրքիայի ժամանակով 02:00-ին Էրզրում նահանգի Թեքման շրջանում հրդեհել են Էրզրում-Չաթ մայրուղու վրա աշխատանք իրականացնող 7 շինարարական մեքենա:

Ըստ թուրքական «Turkiyegazetesi» լրատվակայքի` ՔԲԿ-ի զինյալները, որոնք թուրքական աղբյուրում անվանվում են ահաբեկիչներ, հրդեհել են 2 ասֆալտապատող, 1 ասֆալտահարթեցնող մեքենա և մի շարք այլ շինարարական մեքենաների տեսակներ: Վերջիններս պատկանել էին Թեքման շրջանի ղեկավարությանը:

Քուրդ գրոհայինները մեքենաները հրդեհելուց հետո, մեկ այլ մեքենայով հեռացել են դեպքի վայրից: Թուրքական ոստիկանության աշխատակիցները սկսել են որոնողական աշխատանքներ իրականացնել:

Հավելենք, որ ավելի վաղ ՔԲԿ-ի զինյալները Վանի Չալդըրան գավառից դեպի Բայազետ տանող ճանապարհին էլ 3 բեռնատար էին կանգնեցրել ու այրել դրանք: