Երկրաշարժ Անթալիայում և Թուրքիայի այլ քաղաքներում

Տարածաշրջան10:03, 30 Հուլիս 2015

Երկրաշարժ Անթալիայում և Թուրքիայի այլ քաղաքներում

Թուրքիայում միջին ուժգնության երկրաշարժեր են արձանագրվել: «Milliyet» պարբերականը հայտնում է, որ հուլիսի 29-ին Ռիխտերի սանդղակով 4 բալ ուժգնությամբ երկրաշարժ է տեղի ունեցել Անթալիայի տարածքում: Եվս մեկ երկրաշարժ (5.2 բալ) գրանցվել է այսօր՝ Միջերկրական ծովի` Մերսին քաղաքի մերձակա տարածքում, որը զգացվել է Մերսին, Ադանա, Գազիանթեփ քաղաքներում: Ստորգետնյա այդ ցնցումները մեծ իրարանցում են առաջացրել բնակչության շրջանում: Մարդիկ տներից դուրս են եկել փողոցներ ու երկար ժամանակ չեն համարձակվել վերադառնալ փակ տարածքներ:

Ըստ Թուրքիայի աղետների և արտակարգ իրավիճակների վարչության (AFAD) երկրաշարժերի բաժնի տվյալների՝ Միջերկրական ծովի արևելյան ավազանում ժամը 12.55-ին ծովի 30 մետր խորությունում տեղի ունեցած երկրաշարժի էպիկենտրոնը եղել է Քեմեր շրջանը: Զոհեր կամ նյութական կորուստներ չեն գրանցվել:

Նույն վարչությունից ստացված տեղեկատվության համաձայն՝ Մերսին էպիկենտրոնով 5.2 բալ ուժգնությամբ երկրաշարժը տեղի է ունեցել 01.00-ին, որից հետո դեռևս նման ուժգնությամբ ցնցումներ չեն գրանցվել: Ուժգնությամբ երկրորդ ամենամեծ ցնցումը նկատվել է Աքսարայում (2.5 մ.):

Աղբյուր` Ermenihaber.am