Թուրքիան ու Ռուսաստանը համաձայնության են եկել գազի գնի զեղչման շուրջ

Տնտեսական16:58, 31 Հուլիս 2015

Թուրքիան ու Ռուսաստանը համաձայնության են եկել գազի գնի զեղչման շուրջ

Ռուսաստանի էներգետիկայի նախարար Ալեքսանդր Նովակը հայտարարել է, որ ռուսական «Gazprom»-ն ու թուրքական «BOTAS»-ը համաձայնության են եկել Թուրքիային տրամադրվող գազի գնի 10.25 տոկոս զեղչման շուրջ:

Ըստ թուրքական «Milliyet» թերթի կայքի` Նովակը նշել է նաև, որ համաձայնության տեքստը դեռ չի ստորագրվել:

Մամուլի ասուլիսի ժամանակ Նովակը հերքել է նաև «Թուրքական հոսք» նախագծի չեղյալ հայտարարվելու մասին տարածված լուրերը: Նովակը, անդրադառնալով «Թուրքական հոսք» նախագծին, որով նախատեսվում է ռուսական գազը Թուրքիայի տարածքով հասցնել Եվրոպա, նշել է, որ դրա չեղյալ հայտարարելու մասին իրեն որևէ մեկը որևէ կերպ չի ծանուցել:

«Մենք շարունակում ենք միջկառավարական համաձայնագրի վրա աշխատել: Իմ տեղեկություններով Թուրքիայում ևս աշխատում են այդ ուղղությամբ»,- ասել է Նովակը:

Սև ծովի հատակով Թուրքիայից մինչև Հունաստանի սահման ձգվող «Թուրքական հոսք» գազատարի կառուցման մասին հայտարարվել էր նախորդ տարի դեկտեմբերին Ռուսաստանի Դաշնության նախագահ Վլադիմիր Պուտինի Թուրքիա կատարած այցի ժամանակ։ Գազատարը փոխարինելու է «Հարավային հոսք» նախագծին, որից Ռուսաստանի Դաշնությունը հրաժարվել էր ուկրաինական հակամարտության համատեքստում ԵՄ անդամ որոշ պետությունների կողմից կառուցապատման թույլտվություն չստանալու պատճառով։

Աղբյուր` Ermenihaber.am