Թուրքիայի Սուրբ Երրորդություն հայկական եկեղեցին պահեստից կվերածվի մշակույթի տան

Տարածաշրջան09:03, 01 Օգոստոս 2015

Թուրքիայի Սուրբ Երրորդություն հայկական եկեղեցին պահեստից կվերածվի մշակույթի տան

Թուրքիայի Էսքիշեհիր քաղաքի Սիվրիհիսար շրջանում գտնվող և 1881թ. թվագրվող հնագույն հայկական Սուրբ Երրորդություն եկեղեցին վերանորոգվելու է: Այն երկար տարիներ օգտագործվել է որպես պահեստ:

Անատոլիայում գտնվող հայկական ամենախոշոր եկեղեցիներից մեկը հանդիսացող Սուրբ Երրորդութունը վերակառուցվելու է Թուրքիայի մշակույթի և զբոսաշրջության նախարարության կողմից: Ըստ նախատեսվածի՝ վերանորոգումից հետո եկեղեցին վերածվելու է մշակույթի տան: Եկեղեցու սենյակները վերակառուցումից հետո կդառնան ցուցասրահ, համերգային դահլիճ ու ժողովների սրահ:

Թուրքական «emlakhaberi.com» լրատվակայքի հրապարակած սույն լուրը ներկայացնող «HYTERT»-ն ընդգծում է. «Ցանկալի կլիներ՝ վերակառուցումն իրականացնել այնպես, որ եկեղեցում, այնուամենայնիվ, հնարավոր լիներ պատարագներ մատուցել: Ու տարեկան գոնե մեկ անգամ եկեղեցում պատարագ մատուցելու իրավունք տրվեր»:

Աղբյուր` Ermenihaber.am