Օջալանը թուրք-քրդական հաշտեցման գործողությունները վերսկսելու համար նոր պլան է կազմել

Քաղաքական11:48, 07 Օգոստոս 2015

Օջալանը թուրք-քրդական հաշտեցման գործողությունները վերսկսելու համար նոր պլան է կազմել

«Քուրդիստանի բանվորական կուսակցության» (ՔԲԿ-PKK) դեմ թուրքական բանակի կողմից իրականացվող գործողություններին զուգընթաց նախորդ շաբաթվա վերջում կառավարության պատվիրակությունը հանդիպել է Իմրալը կղզում ցմահ ազատազրկված քրդերի առաջնորդ Աբդուլլահ Օջալանի հետ:

Թուրքիայի կառավարությունը ներկայացնող պատվիրակությունը, որը գլխավորում է Հասարակական կարգի պահպանման ու անվտանգության վարչության պետ Մուհամեդ Դերվիշօղլուն, Օջալանի հետ ունեցած հանդիպումից հետո, հանդիպել է նաև քրդական կուսակցության` Իմրալը այցելող պատվիրակության անդամներից Սըրրը Սուրեյա Օնդերի ու Իդրիս Բալուքենի հետ:

«CNNTurk»-ի տվյալներով՝ թուրքական կառավարության պատվիրակությունն Օջալանի և քրդամետ «Ժողովուրդների դեմոկրատական կուսակցության» (HDP-ԺԴԿ) պատվիրակության անդամների հետ հանդիպման ժամանակ առաջ է քաշել հաշտեցման գործընթացը ընդհատված տեղից կրկին շարունակելու նախապայմանը: Այն է` Թուրքիայի տարածքում գտնվող զինյալների զինաթափումն ու երկրից դուրս գալը:

Հաղորդվում է, որ Օջալանը պետական պաշտոնյաներին խիստ քննադատության է ենթարկել ստեղծված իրավիճակի համար: Նա Թուրքիայում ստեղծված իրավիճակի պատճառ է համարել փոխադարձ քայլերն արագորեն կյանքի չկոչելու հանգամանքը:

Պետական պաշտոնյաները ԺԴԿ-ից պահանջել են ՔԲԿ-ին կոչ անել, որպեսզի վերջիններս հրաժարվեն ջրամբարների վրա հարձակումներ կազմակերպելուց, ճանապարհները փակելուց և նմանատիպ այլ գործողություններից:

ԺԴԿ-ականնեերն էլ Իմրալը այցելելու պահանջ են ներկայացրել, ինչին ի պատասխան կառավարության պատվիրակությունը նշել է, որ քան դեռ զինված գործողությունները չեն ավարտվել, Իմրալը այցելությունները դժվար կլինի, սակայն պետական պատվիրակությունը կշարունակի հանդիպումները Օջալանի հետ:

Կայքը ավելացնում է, որ Օջալանի հետ հանդիպումները շատ կարևոր են, քանի որ ըստ տեղեկությունների վերջինս հաշտեցման գործողությունները վերսկսելու համար նոր պլան է կազմել:

Աղբյուր` Ermenihaber.am