ԻՊ-ի թուրք ահաբեկիչը թուրք ժողովրդին կոչ է արել գրավել Ստամբուլը (տեսանյութ)

Տարածաշրջան07:40, 19 Օգոստոս 2015

ԻՊ-ի թուրք ահաբեկիչը թուրք ժողովրդին կոչ է արել գրավել Ստամբուլը (տեսանյութ)

«Իսլամական պետություն» (ԻՊ) ահաբեկչական կազմակերպությունը Թուրքիային ու նախագահ Ռեջեփ Թայիփ Էրդողանին թիրախավորող տեսանյութ է հրապարակել թուրքերեն լեզվով: Աբու Ամմար ծածկանունով հայտնի ԻՊ թուրք ահաբեկիչը սպառնացել է Էրդողանին, թուրք ժողովրդին էլ կոչ արել գրավել Ստամբուլը:

Ըստ թուքական «Yeniakit » լրատվական կայքի՝ տեսանյութը մեկնաբանել է այն նկարահանած ԻՊ-ի մեկ այլ թուրք ահաբեկիչ էբու Յուսուֆը: Վերջինս հայտնել է, որ տեսանյութի հրապարակման հետ կապված որևէ հրահանգ ԻՊ-ի առաջնորդ Բաղդադիից չեն ստացել, տեսանյութն իրենց սեփական նախաձեռնությունն է:

Յուսուֆի տեղեկացմամբ՝ ավելի մեծ տեսանյութ է պատրաստվում, որը շուտով կհրապարակվի:

«Ռաքքայում թուրքական վաշտեր կան, որոնց հետ մենք քննարկում ենք Թուրքիայի վերաբերյալ իրենց քաղաքականությունը: Ըստ դրա էլ՝ որոշում մեր քաղաքական ուղեգիծը: Բաղդադին նման հարցերին չի խառնվում»,- պարզաբանել է Յուսուֆը՝ տեղեկացնելով, որ Սիրիայում ապրում է 2000 թուրք, որոնք եկել են իրենց ընտանիքների հետ: Յուսուֆը հայտնել է նաև, որ թուրքերը ստեղծել են ռազմական ստորաբաժանումներ:

Տեսանյութում ցույց է տրվել Թուրքիայի քարտեզը, որի արևմտյան մասը փակված է Ամերիկայի, իսկ արևելյան մասը՝ «Քուրդիստանի բանվորական կուսակցության» դրոշով: Տեսանյութում խոսող թուրք ահաբեկիչը պնդել է, թե Թուրքիայի հողերը գրավվելու են ՔԲԿ-ի և «խաչակիրների» կողմից: