Իրանցի նախարարը դատապարտում է Անկարայի քաղաքականությունը

Քաղաքական07:50, 20 Օգոստոս 2015

Իրանցի նախարարը դատապարտում է Անկարայի քաղաքականությունը

Իրանի Իսլամական Հանրապետության (ԻԻՀ) ներքին գործերի նախարար Աբդուրրիզա Ռահմանի Ֆազլին քննադատել է Անկարայի վարած քաղաքականությունը Սիրիայի և քրդերի նկատմամբ:

Թուրքական «Islahhaber» լրատվական կայքի հաղորդմամբ` Ֆազլին, նշելով, որ Թուրքիան աջակցություն է ցուցաբերում «Իսլամական պետություն» (ԻՊ) ահաբեկչական կազմակերպությանը, ասել է. «Սիրիայի հարցում թուրքական պետության վարած քաղաքականության և ԻՊ-ին աջակցելու պատճառով Թուրքիայի սահմաններում խառնաշփոթություն կա, քրդերը վերածվել են Անկարայի համար սպառնալիքի: Սահմանում քրդերը Անկարային բացահայտորեն լարվածության մեջ են պահում»:

Հայտարարելով վերոնշյալ հարցում Իրանի դրսևորած անկողմնակալ քաղաքականության մասին՝ նախարարն ընդգծել է, որ յուրաքանչյուր երկիր պետք է ինքը որոշում կայացնի ներքին խնդիրների հարցում:

Ֆազլին «Քուրդիստանի բանվորական կուսակցության» (ՔԲԿ-PKK) զինված պայքարը որակել է որպես «քրդերի և թուրքական պետության պատերազմ»:

Թուրքական աղբյուրը իրանցի նախարարի հայտարարությունը դիտում է որպես «Թուրքիայի դեմ տարվող սև քարոզչություն»: Ընդգծում է այն հանգամանքը, որ Իրանում այժմ չկա ոչ մի սունի դավանանքի մահմեդական նախարար: Նույնիսկ քրդերով բնակեցված Իրանի նահանգներում ղեկավարության մեջ ընտրվում են հիմնականում այն քրդերը, որոնք սունի չեն:

Աղբյուր` Ermenihaber.am