ERMENI HABER AJANSI

Թուրքիայի նախագահ Ռեջեփ Թայիփ Էրդողանը լրագրողների հետ զրույցում հայտարարել է, որ նոյեմբերի 1-ին երկրում կանցկացվեն վաղաժամ խորհրդարանական ընտրություններ:

Ըստ թուրքական «Anadolu» պետական լրատվական գործակալության` Էրդողանը հայտնել է, որ կառավարություն կազմելու համար նախատեսված 45-օրյա ժամկետն ավարտվելուց հետո` հաջորդ շաբաթ, հանդիպում կունենա մեջլիսի նախագահի հետ, որից հետո երկիրը կգնա նոր խորհրդարանական ընտրությունների ճանապարհով:

«Այս պահին հրապարակված ամսաթիվը նոյեմբերի մեկն է: Ես հաստատում եմ նոր ընտրությունները, Թուրքիայում նոր ընտրություններ կանցկացվեն»,- նշել է Էրդողանը: 

Վերջինս հիշեցնելով, որ կառավարություն կազմելու համար լիազորված վարչապետ և միաժամանակ «Արդարություն և զարգացում կուսակցության» (AKP-ԱԶԿ) նախագահ Ահմեթ Դավութօղլուի կողմից երկու խորհրդարանական կուսակցությունների հետ վարած բանկցությունները արդյունք չեն տվել, նշել է, որ մեկ անգամ էլ գլխավոր ընդիմության առաջնորդին կառավարություն կազմելու լիազորություն տալը ժամանակի կորուստ է համարում: Ուստի  սահմանադությամբ սահմանված կարգով իր որոշմամբ նոր խորհրդարանական ընտրություններ կանցկացվեն երկրում:

Հիշեցնենք, որ հունիսի 7-ին Թուրքիայում տեղի էին ունեցել խորհրդարանական ընտրություններ: Խորհրդարանում հայտնված 4 կուսակցություններից ոչ մեկին չի հաջողվել բացարձակ մեծամասնություն ձևավորել (550 պատգամավորից բաղկացած խորհրդարանում մեծամասնություն ապահովելու համար անհրաժեշտ է 275+1 ձայն)՝ միայնակ կառավարություն կազմելու համար: 40.98 տոկոս ձայն ստացած իշխող «Արդարություն և զարգացում» կուսակցությունն այժմ  խորհրդարան անցած մյուս կուսակցությունների հետ կոալիցիոն կառավարություն կազմելու համար բանակցություններ էր վարում: Սակայն կոալիցիոն կառավարություն կազմելու համար Էրդողանի կողմից լիազորված ԱԶԿ նախագահ և Թուրքիայի վարչապետ Ահմեթ Դավութօղլուի` մյուս կուսակցությունների ղեկավարների հետ անցկացրած  բանակցությունների արդյունքում այդպես էլ կառավարություն կազմելու շուրջ համաձայնության ձեռք չբերվեց: